Aslan Kərimov: “Qarabağ"ın müdafiəçiləri öz cərimə meydançasında..."

"90 dəqiqə domimant futbol sərgilə, sonda rəqib 2 qol vurmaqla vacib səfər qələbəsiylə səni məğlub etsin". Bu sözləri Sport24.az-a açıqlamasında Aslan Kərimov deyib.

Təcrübəli mütəxəssis  "Qarabağ" - "Ludoqorets" oyunu ilə bağlı fikirlərini bölüşüb, cavab qarşılaşması ərəfəsində şansları dəyərləndirib: "İlk dəqiqələrdən "Qarabağ"ın təzyiq edəcəyi gözlənilirdi. Ağdamlılar  hücumlar təşkil etsə də, son nöqtəni qoymaqda çətinlik çəkirdi. Bolqarların 4-4-2 sxemiylə oynaması təmsilçimizin cinahlardan sürətli hücumlar qurmasına imkan yaratsa da, rəqib cərimə meydançası daxilində ikili mübarizələrdə daha yaxşı mübarizə aparırdı. Səmimi etiraf etmək lazımdır ki, bolqarlar çox sıx müdafiə olunmaqla meydan sahiblərinə demək olar ki, boşluqlar vermirdi. Juninyo, Zubir, Benzia qol imkanları yaxalasalar da, cəmi birini dəyərləndirə bildilər. ÇL kimi turnirdə bu qədər fürsətləri boşa verəndə, təbii ki, sonda rəqib səni cəzalandırıb qələbə qazanır. Mən qətiyyən rəqinibin gücünü və layiqli qələbəsini kiçiltmirəm. Amma reallıq odur ki, Ağdam klubu matçın böyük hissəsini üstün keçirərək xoşbəxtliyi rəqib qapısında axtardığı halda qonaqlar 3-4 hücum təşkil etməklə iki dəfə Buntiçi məyus edib, Bakıdan qələbəylə döndülər".

Kərimov "Qarabağ"ın müdafiədə zəif təsir bağışladığını da vurğulayıb: "Bu matç "Qarabağ"ın "Bayer"ə qarşı oyunlarını, əsas da səfər görüşünü xatırlatdı. Almanlar hücum edir, biz isə əlimizə düşən azsaylı qol imkanlarından maksimum yararlanırdıq. Fikir verdinizsə, bolqarlar hər iki qolu "ikinci mərtəbə"dən vurdular. Görünən odur ki, "Qarabağ"ın müdafiəçiləri öz cərimə meydançasında hava toplarına çıxarmaqda çətinlik çəkirlər. Əminəm ki, Qurban müəllim bu çatışmazlığı nəzərə alacaq. "Qarabağ"ın Sofiyadan Bakıya qələbə ilə qayıtmaq şansı var. Birincisi, rəqib heç də təmsilçimizdən güclü deyil, ikincisi, bolqarların aparıcı oyunçusu sıradan çıxıb, üçüncüsü isə "Qarabağ" ilk matçdakı səhvlərində dərs çıxarıb səfərdə daha güclü təzyiq etməklə qələbəyə köklənəcəklər. Təbii ki, bəxt amilini də nəzərə almaq lazımdı. "Qarabağ" alışdığımız, ənənəvi futbolunu sərgiləcəyi təqdirdə uğurun bizim tərəfimizdə olacağını düşünürəm. Komandamıza uğurlar arzu edirəm".

Qeyd edək ki, "Ludoqorets" – "Qarabağ" matçı avqustun 13-də keçiriləcək.

ABDULLA İSMAYILOĞLU