İdman.biz
"Kəpəz" – "Turan Tovuz" nəticəsi gözlənilən idi".
Bunu İdman.bizə Azərbaycan millisinin sabiq futbolçusu Aslan Kərimov deyib.
O, Azərbaycan Premyer Liqasının III turunu şərh edib.
52 yaşlı mütəxəssis bildirib ki, "Kəpəz" – "Turan Tovuz" (0:3) qarşılaşmasında komandalar arasındakı fərq özünü aşkar göstərib: "Adil Şükürov nə qədər bacarıqlı məşqçi olsa da, büdcənin azlığı transferi çətinləşdirir. Belə halda da nəticə vermək olmur. Gəncə təmsilçisi son zamanlar həm məşqçi, həm də oyunçu transferi ilə gündəmdə olan "Turan Tovuz"a uduzdular. Bundan öncə "Qarabağ"la matçda da eyni hal yaşanmışdı. Fərq istər-istəməz özünü göstərir. Burada texniki və taktiki baxımından komandanın hansı səviyyədə olmasından söhbət getmir. Əsas məsələ oyunçuların keyfiyyətidir. Belə büdcə ilə maliyyəsi səndən yuxarı olanlara uduzmaq məcburiyyətində qalırsan. Bu budcə ilə "Kəpəz"in çox da şansı yoxdur. Əgər bu hal davam etsə və eyni heyətlə qalıb, komandanı gücləndirməsələr yalnız əzimkarlıq sayəsində qələbə qazana bilərlər. Amma bütün bunlar nəyisə dəyişməyəcək".
O bildirib ki, "Sumqayıt" - "Səbail" (2:1) matçında meydan sahibləri sonadək mübarizəsi nəticəsində aktivinə 3 xal əlavə edib: "Doğma azarkeşlər qarışında oynamaq da hesaba təsir etdi. "Səbail" bu mövsüm bir çox aparıcı futbolçusunu satdı. Bir çoxları onların büdcəsinin azaldıldığını deyir. Yalnız "Kəpəz"dən fərqləri odur ki, yerli oyunçuların bəzilərini saxlaya bildilər. Buna görə o qədər də çox zəif görünmürlər. "Sumqayıt"ın son dövrlərdəki yüksəlişini görürük. Konfrans Liqasında məğlub olmalarının səbəbi ancaq "qırmızı vərəqə" idi. Bunu daxili çempionatda da "davam etdirməyə" çalışırlar. Samir Abbasov özünün xarakterini komandasına keçirib. Hansı ki, daha vuruşqan və daha emosionaldır. "Səbail" üçün də mövsümün çox çətin çəkəcəyini düşünürəm".
O bildirib ki, "Neftçi"nin "Sabah"a 0:2 hesablı məğlubiyyəti ilə bağlı isə səhərə qədər danışmaq olar: "Sabah" bu matçda "ağ-qaralar"dan daha yaxşı görünürdü. Tez-tez qol imkanları yaradırlar. "Neftçi"yə nisbətən aqressiv idilər. Amma "ağ-qaralar" barədə danışmağa söz tapmıram. Bu qədər imkanları ola-ola artıq 3 turdur ki, heç bir qığılcım görünmür. Məşqçinin idarəçiliyi məni qane etmir. Hər zaman kimlərləsə konflikt yaşayır. U-21 millisindən transfer etdikləri futbolçunu oynatmır və ya Fərid Yusifli ilə məşqdə mübahisə edirlər. Cavan oyunçu ilə baş məşqçinin nəyə görə dalaşmalıdır? Bəlkə də, mədəniyyət fərqləri var. Qriqorçukun şəxsi keyfiyyətləri ilə yanaşı, idarəçilik baxımından bəlli şübhələrim var idi. Artıq bunun öz əksini tapdığını görürəm. Təbii ki, bütün bunların taktiki-texiniki baxımdan bir səbəbi yoxdur. Yəni məşqçinin bəlli bir oyun təcrübəsi var, amma idarəçiliyi fikirlərini komandaya çatdırmasına imkan vermir. 3 turdur oyunçularda pərakəndəlik var. Maraqlıdır ki, Qara Qarayevi nəyə görə oynatmayasan? Hətta onu əsas heyətin oyunçusu kimi görmədiyini də bildirib. Amma nəyə və hansı keyfiyyətlərinə görə görmürsən? Bunun da açıqlamasını versə, daha yaxşı olar. Sən o cür oyunçunu ehtiyatda saxlayırsansa və ancaq legionerlərlə davam etmək istəyirsənsə nəticə də bu cür olacaq. Emin Mahmudova yazığım gəlir. O nəsə etməyə çalışır, amma... Düşünmürəm ki, "Qarabağ"ın məşq prosesi "Neftçi"dən qat-qat üstündür. Texniki-taktiki baxımdan da "Qarabağ"da hər şey möhtəşəm deyil. Amma bu halı Ağdam klubu ilə müqayisə etməli olsaq, Qurban Qurbanov futbolçuları idarə etməkdə ən üst səviyyədədir".
Qeyd edək ki, turun "Şamaxı" - "Qarabağ" və "Zirə" - "Araz Naxçıvan" oyunları təxirə salınıb.
Banuçiçək Hüseynli
İdman.biz
