Aslan Kərimov: “İlk dəqiqələrdən müdafiəyə çəkilməklə aqressiv rəqibə üstünlük vermiş olarıq”

"Səfərdə qazanılan minimal hesablı qələbə "Zirə"ni aldatmamalıdı. Moldova təmsilçisinin Rəşad Sadıqovun komandasını artıq yaxşı analiz etdiyini düşünürəm. Onlar erkən qol və qollar vurmağa çalışacaqlar. Fikrimcə, şanslar 50-nin, 50-yədi". Bu sözləri Sport24.az-a açıqlamasında Aslan Kərimov deyib.

Təcrübəli mütəxəssis meydan sahiblərinin təmkinli, ehtiyatlı oynamalı olduğunu da vurğulayıb: " Tiraspolda keçirilən ilk oyunda təmsilçimiz ehtiyatlı oyuna üstünlük verməklə həm qapısının toxunulmazlığını təmin etdi, həm də vacib qol vurub qələbə qazandı. Amma bu o demək deyil ki, növbəti mərhələ üçün çox şey həll olunub. "Zirə" yenə də qapısının toxunulmazlığını saxlamaqla kəsərli hücumlar təşkil etməlidi. Mərhələ keçmək istəyiriksə qol vurmalıyıq. İlk dəqiqələrdən müdafiəyə çəkilməklə aqressiv rəqibə üstünlük vermiş olarıq. İlk görüşdə "qartallar" qalib gəlsə də, bəzi yerli oyunçular heç də yaxşı səviyyədə çıxış etmədi. Onlar ya ötürmələrdə səhvlərə yol verir, ya vacib anda top itirir, ya da qərar verməkdə çətinlik çəkirdi. Bu səhvləri təkrarlansa təmsilçimizə baha başa gələ bilər. Əminəm ki, Rəşad Sadıqov dediklərimizi bizdən daha yaxşı bilir və çatışmazlıqlarla bağlı tədbir görüb. Unutmayaq ki, "Şerif"in heyətində 7-8 oyunçu ilk dəfə idi rəsmi oyuna çıxırdı. Onların bir-birlərinə tam uyğunlaşmamağı "Zirə"ni xeyrinə oldu. Bir daha təkrar edirəm ki, "Zirə"ni Moldovadakından daha ağır, məsuliyyətli oyun gözləyir".

Qeyd edək ki, "Zirə" – "Şerif" matçının start fiti bu gün saat 20:00-da "Dalğa Arena"da səslənəcək.

ABDULLA İSMAYILOĞLU