Idman.biz
"Hər iki təmsilçimiz mərhələ adladıqca, daha güclü rəqibə qarşı oynayır. Buna baxmayaraq, klublarımızın şanslarını yüksək qiymətləndirirəm".
İdman.biz xəbər verir ki, bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov bu gün UEFA Konfrans Liqasının III təsnifat mərhələsində Kiprin "Omoniya" kollektivini qəbul edəcək "Araz-Naxçıvan" və Bolqarıstanda "Levski" klubunun qonağı olacaq "Sabah"ın şanslarını dəyərləndirərkən deyib.
Mütəxəssis bildirib ki, hər iki komanda II raundda yaxşı nəticə ilə azarkeşləri təəccübləndirib: "Naxçıvan klubu Yunanıstan "Aris"i ilə matçda da favorit hesab edilmirdi. Lakin əzmkar mübarizə apararaq növbəti mərhələyə vəsiqə qazandı. Bəlkə də çoxumuz Elmar Baxşıyevin komandasından belə nəticə gözləmirdik. Amma bizi yaxşı mənada təəccübləndirdilər. Elə bu gün keçiriləcək hər iki qarşılaşmada da təcrübə və maliyyəni əsas götürsək, rəqiblər favorit sayılır. Amma əvvəlki matçlarda olduğu kimi, bu dəfə də sürprizlə qarşılaşa bilərik. "Qırmızı-ağlar" əks hücumlarda çox yaxşı oynadıqlarını göstərdilər. Lazım olan anda meydanın mərkəzini ələ almağı bacarırlar. Bütün bunların sayəsində Kipr klubunu üstələyə bilərlər. "Sabah" isə cinah hücumlarının sayəsində "Petrokub"a darmadağınla qalib gəldi. Cinahda çıxış edən hücumçuları həddindən artıq güclü və sürətlidirlər. Bu, onlar üçün üstünlükdür".
Kərimov hesabla bağlı proqnoz verməyin çətin olduğunu söyləyib: "Çünki rəqiblərin oyun üslubuna çox da bələd deyilik. Yalnız bugünkü matçları izlədikdən sonra daha dəqiq fikir bildirmək olar".
Qeyd edək ki, "Liv Bona Dea Arena"da keçiriləcək "Araz-Naxçıvan" - "Omoniya" görüşü saat 20:00-da, Sofiya şəhərindəki Georgi Asparuxov stadionunda təşkil olunacaq "Levski" – "Sabah" matçı isə Bakı vaxtı ilə saat 22:00-da başlayacaq.
İdman.biz
