Sport24.az
RƏŞAD
Mahir Emreli karyersında yeni səhifə açmağa yaxındı. Millinin də şərəfini qoruyan futbolçu bu dəfə Avropanı Asiyaya, daha dəqiq desək, Almaniyanı Koreyaya dəyişməyə yaxındı. "Seul" Emreli üçün "Nürnberq"ın qapısını döyməyə hazırlaşır.
Bu keçidin reallaşıb-reallaşmayacağı yaxın zamanda məlum olacaq ki, bu başqa mövzunun söhbətidi. İndiki anda Mahirin Almaniya klubundan ayrımasını müzakirə etmək, daha doğrusu, onun bu qərarına münasibət bildirmək istəyirəm.
İlk növbədə Emreli niyə əksər azərbaycanlı futbolçuların arzusunda olduğu Almaniya klubunu Koreya təmsilçisinə dəyişmək fikirinə düşdüyünə diqqət yetirmək lazımdı.
Zəifdi, rəqabətdə geri qalır? Məncə, əksinə futbolçunun komandaya nə qədər lazımlı olduğunu "Nürnberq"in baş məşqçisi, Almaniya futbolunun tanınmış simalarından biri olan Miroslav Klozenin açıqlamalarından görmək mümkündü. Mütəxəssis hər fürsətdə Mahirin ona lazım olduğunu bildirir. Deməli, məsələ heç də milli üzvünün zəif futbolçu olmasında deyil. Səbəbi başqa yerdə axtarmaq lazımdı...
Emrelinin nə qədər inadkar, prinsipial futbolçu olduğunu karyerasının Avropa kitabını səhifələdikcə görmək mümkündü. Polşada müəyyən problemlərlə üzləşdikdən sonra düşünmək olardı ki, əksər azərbaycanlı futbolçular kimi Mahir yenidən Vətənə dönüb, Azərbaycan Premyer Liqasında çıxış edəcək. Ancaq o nə etdi? Polşanı Xorvatiyaya dəyişdi. Etiraf edək ki, keçmiş Yuqoslaviya respublikasında zədə səbəbindən özünü tam göstərə bilmıədi. Ancaq legioner həyatını davam etdirməkdə israrlı oldu və bu dəfə Almaniyaya üz tutdu. "Nürnberq"də hər şey yolunda getdiyi vaxt futbolçumuz ehtiyatda qalmağa başladı. Hər şey, bizə qaranlıq qalan sirr də məhz bundadı.
Kloze "Mahir mənə lazımdı" deyirsə, "niyə bəs ona güvənmir" sualı hamı üçün maraqlıdı.
Almaniya mətbuatında yazılanlara görə, "Nürnberq" rəhbərliyi son vaxtlar siyasəti dəyişib, daha çox gənc futbolçuları "vitrinə" çıxartmaqla futbolçu satışından pul qazanmağı qarşısına məqsəd qoyub. Mahir isə gənc deyil. Hazırda 28 yaşı var və müqaviləsinin müddəti də yayda başa çatır. Klubla anlaşması başa çatan futbolçuya da nə bizdə, nə də orda daim oynamaq şansı verilmir. Deyə bilərsiz ki, hər şey baş məşqçinin istəyindən asılıdır. Klozeyə lazımdırsa oynadacaq. Ancaq futbolun amansız qanunlarından biri də rəhbərliyin baş məşqçinin işinə müdaxilə etməsidir. Bu tək Azərbaycanda deyil, bütün dünyada olur. Necə deyərlər, musiqini pul verən sifariş edir. Rəhbərlik də pul qazanmaq üçün bu yolu seçib, baş məşqçi də bununla razılaşmaq məcburiyyətindədir.
Kloze yuxarıların çaldığı musiqiyə qol-qanad qaldırıb rəqs etməyə razılaşıbsa, Mahir bununla barışmır və daim oynaya biləcəyi kluba keçmək istəyir. İmdiki məqamda da ona "elçi" düşən "Seul"du və o da təklifi dəyərləndirməyi lazım bilir.
Odur ki, Mahiri Asiyaya üz tutmaq istıdiyinə görə asıb-kəsmək, qınamaq olmaz. Əksinə futbolçu kimi kamillik yaşına çatan futbolçumuzu pinsipiallığına görə alqışlamaq, dəstək vermək lazımdı. Unutmayaq ki, o, həm də milli üzvüdür. Ölkənin əsas komandasına isə Emreli kimi futbolçular lazımdı.
