Idman.biz
2022-ci ilin payızında "Arsenal"ın baş məşqçisi Mikel Arteta komanda ilə oteldə maraqlı bir oyun təşkil edib. Şərtə görə, futbolçulardan biri kiçik bir əşyanı ayaqqabısında gizlətməli, məşqçi isə onun kimdə olduğunu tapmalı idi.
İdman.Biz xəbər verir ki, bu maraqlı hadisə Sem Dinin Mikel Artetanın rəhbərliyi altında "Arsenal"ın yenidən yüksəlişindən bəhs edən "Arsenal: Klubun dirçəlişinin pərdəarxası hekayələri" adlı kitabında yer alıb.
Artetanın fikri futbolçuların bədən dilini və göz təmasını müşahidə edərək əşyanı kimin gizlətdiyini müəyyənləşdirmək olub. O, komandadakı oyunçuları kifayət qədər yaxşı tanıdığına əmin idi.
Məşqçi şərt də qoyub: əgər düzgün cavabı tapa bilməsə, futbolçuları və onların ailələrini şam yeməyinə qonaq etməli olacaqdı. Komanda bu təklifi qəbul edib. Arteta və köməkçiləri isə gizlədilən əşyanı görməmək üçün otaqdan çıxıblar.
Əşya gizlədildikdən sonra ispaniyalı mütəxəssis otağa qayıdaraq futbolçuları diqqətlə nəzərdən keçirməyə başlayıb. Hətta bəzilərinin nəbzini də yoxlayıb. Sonda seçim edib və əşyanın braziliyalı müdafiəçi Qabriel Maqalyaesdə olduğunu bildirib.
Komanda üzvləri təəccüblərini gizlədə bilməyiblər. Çünki Arteta doğru cavabı tapmışdı.
Lakin hadisənin əsl səbəbi sonradan məlum olub. "Tottenhem"lə derbi oyunundan sonra Arteta sirrini açıb. Məlum olub ki, o, futbolçuların fikirlərini oxumayıb, sadəcə, oteldəki müşahidə kameralarının görüntülərinə baxıb.
