Idman.biz
İslandiya yığmasının baş məşqçisi Arnar Qunnlauqsson DÇ-2026-nın seçmə mərhələsində Azərbaycan millisinə qarşı keçiriləcək oyun haqqında danışıb.
İdman.biz Sportinfo.az-a istinadən xəbər verir ki, 52 yaşlı mütəxəssis seçmə mərhələyə qələbə ilə başlamaq istədiklərini bildirib.
Qunnlauqsson ev matçında azarkeş dəstəyinə ehtiyac duyduqlarını söyləyib:
"Azərbaycanla oyun mənim üçün xüsusi an olacaq. Bu, "Laugardalsvöllur" stadionunda ilk matçımdır. Mənim və ailəm üçün çox böyük hadisədir. Bu stadion indi dünya səviyyəsinə uyğundur".
Baş məşqçi Azərbaycanla ev oyununda qələbə qazanmağın olduqca vacib olduğunu vurğulayıb.
"Kağız üzərində Azərbaycan qrupun ən zəif komandası göstərilə bilər. Ancaq hər şeyə meydanda aydınlıq gəlir. Fransa ilə görüşdə stadionun dolacağını bilirəm. Amma Azərbaycana qarşı da azarkeşlərin dəstəyi bizim üçün əvəzsiz olar. Gəlin, dünya çempionatına vəsiqə qazanmağa birgə çalışaq", - Qunnlauqsson bildirib.
İslandiya millisi sentyabrın 5-də Reykyavikdə Azərbaycanla, dörd gün sonra isə Parisdə Fransa ilə qarşılaşacaq.
İdman.biz
