Idman.biz
İslandiya millisinin baş məşqçisi Arnar Qunnlauqsson Azərbaycan və Fransa yığmalarına qarşı 2026-cı il dünya çempionatının seçmə oyunları üçün açıqladığı heyətdən xeyli razı qalıb.
İdman.biz Sportnet.az-a istinadən xəbərverir ki, 52 yaşlı mütəxəssis çətin seçim etdiyini söyləyib.
"Bu, sadəcə, dəhşət idi. Seçim imkanlarım get-gedə çətinləşir. Nə qədər oyunçu özlərini göstərir və yaxşı işlər görürlər?! Sonsuz sayda oyunçu dəvət edə bilərdim. Əminəm ki, yenə kimisə yaddan çıxaracaqdım", deyə Qunnlauqsson vurğulayıb.
O, Azərbaycan və Fransa millilərinə qalib gəlmək üçün əllərindən gələni edəcəklərini açıqlayıb: "Dünya futbolunda lazımi qələbələrdən danışmaq çətindir. Lakin biz bu iki rəqibi yenmək üçün gücümüzü qoyacağıq. Bu, onlara mütləq qalib gəlməli olduğumuz anlamı vermir. Gələcək perspektivə yönələn oyun sərgiləmək lazımdır".
Yeni baş məşqçi İslandiya millisinin sükanı arxasında indiyədək 3 oyun keçirib. Azərbaycanla qarşılaşmada o, baş məşqçi kimi Reykyavik şəhərindəki "Lauqardalsvollur" stadionunda ilk oyununa çıxacaq: "Bu, özüm və ailəm üçün vacib an olacaq. İlk dəfə burada 1977-ci ildə oyun izləmişəm. O vaxtda bu arena xeyli dəyişib. Cəsarətlə deyə bilərəm ki, stadion dünya səviyyəlidir. Bilirəm ki, Fransa ilə oyunda tribunaları doldurmaq asan olacaq. Lakin Azərbaycanla qarşılaşmada bizə köməyin göstərilməsi qiymətsiz olardı. Gəlin, sadəcə, dünya çempionatına çıxaq, uğur qazanmağa çalışaq".
Qeyd edək ki, İslandiya Azərbaycan millisi ilə sentyabrın 5-də evdə, Fransa ilə sentyabrın 9-da səfərdə üz-üzə gələcək. Hər iki oyun Bakı vaxtı ilə saat 22:45-də başlanacaq.
İdman.biz
