İdman.biz
"Kəpəz" - "Araz-Naxçıvan" matçında favorit Naxçıvan təmsilçisi olsa da, ev sahiblərinin son dönəmlərdəki irəliləyişi göz önündədir".
Bunu İdman.bizə Azərbaycan millisinin sabiq məşqçisi Arif Əsədov deyib.
O, Azərbaycan Premyer Liqasının 14 turunda baş tutan matçları şərh edib. Əsədov bildirib ki, "Kəpəz" - "Araz-Naxçıvan" (0:2) maraq böyük olub: "Oyun onu göstərdi ki, qonaqların ardıcıl qələbələri təsadüfi deyil. Komanda artıq yaxşı formalaşıb. Avrokuboka vəsiqə qazanmağa namizədlərdən biridir. Bu baxımdan artıq hər kəs "Araz-Naxçıvan" gücünə bələd olmalıdır".
Millinin sabiq məşqçisi "Səbail" - "Qarabağ" (0:3) qarşılaşmasında isə Ağdam təmsilçisinin gücünü şərh etməyə ehtiyacın olmadığını deyib: "Hər şey açıq-aydın ortada idi. "Səbail"də futbolçu qıtlığı var. Zədəli oyunçuları da çoxdur. Bu səbəbdən "Qarabağ" matça sanki test oyunu kimi çıxmışdı. Əsas futbolçularını meydana buraxmışdı. Avropa Liqasında növbəti görüşə hazırlaşırdı. Düzdür, ilk dəqiqələr "Qarabağ" üçün çətin oldu. Fikrimcə, bu meydança ilə bağlı idi. "Səbail" taktiki baxımdan oyununu düzgün qurmuşdu. Cavid Hüseynov hiss olunurdu ki, "Qarabağ"ı yaxşı analiz edib. Buna görə də daha çox komanda kompakt oynamağa çalışırdı. Lakin heyətdəki yorğunluq hiss olunurdu".
Onun sözlərinə görə, "Neftçi" - "Zirə" (2:1) duelində hər iki tərəf üçün 3 xal vacib olsa da, "ağ-qaralar" bunu bacarıblar: "Qonaqlar qalib gəlsəydilər, liderlər qrupuna yaxınlaşacaqdılar. "Neftçi" isə son pillələrdən qurtulmalı idi. Oyunda bərabər səviyyəli keçdi. Amma Bakı təmsilçisi imkanlarından lazımınca istifadə edib, qələbəsini rəsmiləşdirdi".
Əsədov bildirib ki, "Sumqayıt" - "Şamaxı" (1:2) görüşü oyun baxımından daha yaxşı alınıb: "Hesabı qonaqlar açsalar da, "Sumqayıt" təzyiqi artırdı. Hiss olunurdu ki, qol da vuracaq və bunu da bacardı. Geridönüşlə qələbə qazandı. "Sumqayıt"da da Vaqif Cavadov gələndən sonra yaxşıya doğru dəyişəkliklər var".
Təcrübəli mütəxəssis turun mərkəz görüşlərindən birində - "Turan Tovuz" - "Sabah" (1:1) qarşılaşmasında xalların yarı bölünməsini hər 2 tərəf üçün itki adlandırıb: "Burda da komandalar üçün 3 xal vacib idi. İlk hissədə üstün olan "Turan Tovuz" ikinci 45 dəqiqənin startında fərqləndi. Lakin hesabı qoruya bilmədi və komandalar 1 xalla kifayətləndilər".
Qeyd edək ki, turnir cədvəlinə rəqiblərindən 1 oyun az keçirən "Qarabağ" başçılıq edir. Onların aktivində 34 xalı var. Ağdam təmsilçisindən 1 xal geri qalan "Araz Naxçıvan" ikinci pillədə qərarlaşıb. "Üçlüy"ü 27 xalla "Turan Tovuz" qapayır.
Banuçiçək Hüseynli
İdman.biz
