İdman.biz
"Zirə" ilk oyunda heç-heçə etsə də, Bakıdakı matç təmsilimiz üçün çətin olacaq".
Bunu İdman.bizə Azərbaycan millisinin sabiq məşqçisi Arif Əsədov deyib.
O, Konfrans Liqasının III təsnifat mərhələsi çərçivəsində Bakıda keçiriləcək "Zirə" – "Osiyek" matçını dəyərləndirib. Təcrübəli mütəxəssisin sözlərinə görə, komandaların şanları bərabərdir: "Zirə"ni bir qədər üstün qiymətləndirərdim. Rəqibin zəif və güclü tərəflərini yəqin ki, ilk oyundan sonra analiz ediblər. Xorvatlar hücum zamanı dərinlik və genişlikdən istifadə etməyə çalışırlar. Eyni zamanda, cinahları tez-tez dəyişməklə müdafiədəki boşluqları axtarırlar. Yaxşı tamamlayıcı futbolçuları var. Gənc olsalar da, sürətlidirlər. Standart vəziyyətlərdə də təhlükəlidirlər. Zəif cəhətləri isə hücumda olduqları zaman müdafiədə boşluqlar buraxırlar".
Onun sözlərinə görə, "Zirə" də rəqibin məhz zəif tərəflərindən istifadə etməlidir: "İlk oyunda əks-hücumda boşluqdan istifadə edib penalti qazadılar və bunu qola çevirdilər. Yenə "Zirə"yə inamımız çoxdur".
Qeyd edək ki, "Zirə"- "Osiyek" matçı bu gün saat 20:30-da "Liv Bona Dea Arena"da keçiriləcək. Komandalar arasında ilk oyun 1:1 hesabla başa çatıb.
Banuçiçək Hüseynli
İdman.biz
