Sport24.az
"Sentyabrda bizi dünya çempionatının seçmə mərhələsinin oyunları gözləyir. Bunlar son yoldaşlıq matçlarıdır". Bu sözləri Sport24.az-a açıqlamasında Azərbaycan millisinin sabiq məşqçisi Arif Əsədov deyib.
Mütəxəssis yığmanın iyunun 7-də səfərdə Latviya, 10-da Bakıda Macarıstan seçməsinə qarşı keçirəcəyi qarşılaşmalarla bağlı fikirlərini bölüşüb:
"Macarıstanı orta səviyyəli millilərdən hesab etmək olar. Latviya isə bizim səviyyədə olan komandadır. Yoldaşlıq görüşlərində nəticə önəmli olmasa da, amma millinin bugünkü durumunu da nəzərə almaq almaq lazımdır. Uzun müddətdir qələbə qazanılmayıb. Son qalibiyyət Qazaxıstan üzərində iyun ayında olub. Artıq üstündən bir il keçib. Ona görə də uğurlu nəticə millinin əh-ruhiyyəsinin, psixoloji durumun yaxşılaşması və kollektivə inamın qayıtması baxımından vacibdir. Düşünürəm ki, bu görüşlərdə nəticə əldə etmək lazımdır. Millimizə uğurlar arzulayıram".
Əsədov baş məşqçi Fernandu Santuşun uzun müddət komanda ilə birlikdə olduğunu söyləyib:
Demək olar ki, izlədiyi namizədləri nəzərdən keçirib və bu iki matçda optimal heyəti formalaşdıra bilər".
Qeyd edək ki, Azərbaycan yığmasının 2024-cü il iyunun 11-də Qazaxıstana 3:2 hesabı ilə qalib gəldiyi görüşdə komandaya Arif Əsədov rəhbərlik edib.
