Idman.biz
Azərbaycan yığmasının sabiq məşqçisi Arif Əsədovun futbolinfo.az saytına müsahibəsi
– Millimiz son yoxlama matçlarında Latviya ilə qolsuz heç-heçə etdi, Macarıstana isə 1:2 hesabı ilə uduzdu. İlk olaraq Latviya ilə görüş haqda fikrinizi bildirərdiniz…
– Görünən o idi ki, Fernandu Santuş daha çox seçmə mərhələdəki rəqibləri düşünərək, həmin oyun sistemi ilə futbolçuları meydana buraxmışdı. Tam olmasa da, 70-80 faiz optimal heyəti düşünürdü. Oyuna gəldikdə isə matçı aqressiv keçirmədik. Sadəcə, taktiki gediş görünürdü. Komandamız müdafiə olunmağa diqqət yetirir, "iki nömrə" kimi çıxış edirdi. Qol imkanlarımız da oldu, amma istifadə edə bilmədik. Pis və ya yaxşı oynadığımızı deməzdim, sadəcə, millimizdə bir az inamsızlıq hiss olunurdu. Halbuki Latviyanın gücünü nəzərə alaraq, onlara qarşı başqa oyun sistemi ilə çıxıb qələbə qazanmaq da olardı.
– İkinci oyunda isə Macarıstanla qarşılaşdıq və yenə macarlara məğlub olduq. Milli bu görüşdə necə təsir bağışladı?
– Bu görüşdə düzgün oyun sistemi seçilmişdi. Macarıstan seçmə mərhələdəki rəqiblərimiz səviyyəsində bir komanda olduğu üçün "ikinci nömrə" ilə oynadıq, heyətdə də bəzi dəyişikliklər edilmişdi. Renat Dadaşovun Mahir Emreli ilə birlikdə oynaması hücum potensialımızı da artırmışdı, top hücum xəttimizdə qalırdı. Ümumi oyun planında istəkli olduğumuz görünürdü, aqressivlik də var idi. Təbii ki, rəqibin ustalıq səviyyəsi bizdən üstün olduğu üçün oyuna onlar diktə edirdilər, bir çox qol imkanları da oldu. Amma millimiz də ara-sıra hücumlar edirdi, qol da vurduq. Hətta görüşün sonlarında hesabı bərabərləşdirə də bilərdilər. İki oyunu müqayisə etsək, macarlarla matçda komanda daha inamlı görünürdü. Bəlkə də bu, evdə, azarkeşlərimizin qarşısında oynamağımızla bağlı idi. Ancaq yenə də qalibiyyətin olmaması komandada özünə inamsızlığı göstərir.
– Fernandu Santuşun rəhbərliyi altında 10 oyunda bir qələbə yoxdur. Bunu necə dəyərləndirirsiniz?
– Bu onu göstərir ki, Santuş hələ də bizim oyunçuların tam potensialını tuta bilməyib. Düşünürəm ki, futbolçularımız hücum etməyi daha çox xoşlayırlar. Bunu Macarıstanla oyunda da gördük. Matçın sonlarına yaxın sistemdə dəyişiklik edərək daha çox hücumameyilli futbolçuları meydana buraxdı və bundan sonra millimizin oyununda canlanma hiss olundu, qol imkanları da yaratdıq. 10 oyunda qələbənin olmaması seçmə mərhələdəki oyunlarımıza mənfi təsir göstərə bilər.
– Seçmə mərhələdə bizi Fransa, Ukrayna və İslandiya ilə oyunlar gözləyir. Bu gedişlə tsikl oyunlarında fiasko ilə üzləşə bilərik?
– Düşünmürəm ki, fiasko ola bilər. Hələ vaxt var. İnanırıq ki, futbolçularımız həmin vaxt yaxşı formada olacaqlar. İndi mövsümün sonu idi, psixoloji yorğunluq təsir edir. Seçmə mərhələ oyunlarında hər şey dəyişə bilər. Bu qrupdakı komandalardan xallar götürməyə qadirik. Komandamız bunu əvvəlki illərdə də sübut edib. Bu futbolçular İsveçə və Slovakiyaya qalib gəliblər. Sadəcə, bir balaca inamsızlıq yaranıb, onu aradan götürmək lazımdır.
İdman.biz
