Arif Əsədov "Sabah"ın "Petrokub" üzərində qələbəsini şərh edib, komandanın Konfrans Liqasında əsas mərhələyə yüksəlmək şansını yüksək qiymətləndirib

"Səfərdəki qələbədən sonra "Sabah"ın evdə də rəqibi üstələyəcəyi heç kimdə şübhə doğurmurdu". Bu sözləri Sport24.az-a açıqlamasında Azərbaycan millisinin sabiq məşqçisi Arif Əsədov deyib.

Təcrübəli mütəxəssis Azərbaycan təmsilçisinin UEFA Konfrans Liqasının II təsnifat mərhələsinin cavab matçında Moldovanın "Petrokub" klubunu 4:1 (ilk oyun 2:0) hesabı ilə məğlub etdiyi oyunla bağlı fikirlərini bölüşüb:

"İkinci görüşə ciddi yanaşmaq və boşalmamaq vacib idi. Komanda da ciddi yanaşmışdı və motivasiyalı idi. Son matçlarda da eyni heyət oynadılır. Qarşılaşmaya yaxşı kökləndikləri də hiss olunurdu. Gedişat da "Sabah"ın daha üstün olduğunu göstərdi. Ustalıq səviyyəsi göz qabağındadır. Rəqib nələrsə etmək istəyirdi. Amma son nöqtəni qoya biləcək ustalıq səviyyəsi çatmırdı. "Sabah"ın hücum potensialı çox yüksəlib. Bu, yeni baş məşqçinin gəlişindən sonra hiss edilir. Hücumda daha aktivdilər və kreativ futbol sərgiləyirlər. Komandada balans yaranıb".

Əsədov Azərbaycan təmsilçisinin növbəti raundda da yaxşı çıxış edə biləcəyini söyləyib: "Rəqibdən çox şey asılıdır. "Sabah" oyundan-oyuna daha keyfiyyətli futbol göstərir. Bu baxımdan Konfrans Liqasına əsas mərhələyə yüksəlmək şansları var. Təbii ki, oyun planında və irəli çıxanda əks-hücumlarda daha diqqətli olmalıdırlar".

Qeyd edək ki, "Sabah" III təsnifat mərhələsində Bolqarıstanın "Levski" (Sofiya) klubu ilə üz-üzə gələcək.