Sport24.az
"Səbail" - "Şamaxı" matçı 6 xallıq matç idi. Meydan sahibləri oyuna pis başlamadı. Sonradan "Şamaxı" qol vurmaqla təşəbbüsü ələ aldı. Qonaqlar gözəl oyunu ikinci hissədə də davamın gətirdi. "Səbail"in kubokda itirdiyi fiziki güc özünü göstərdi". Bu sözləri Sport24.az-a açıqlamasında Arif Əsədov deyib.
Misli Premyer Liqasının 26-cı turunun oyunlarını dəyərləndirən mütəxəssis turun digər qarşılaşmalarına da toxunub:
"Sumqayıt" - "Qarabağ" oyununda təbii ki, favorit Ağdam təmsilçisi idi. Sumqayıt artıq uzun müddətdir ki, nə qol vurur, nə də qələbə qazanır. Bu baxımdan "Sumqayıt" işini bir qədər də çətinləşdirdi. "Qarabağ" isə çempionluq yolunda inamla addımlayır.
Turun ən maraqlı oyunu "Turan Tovuz" - "Zirə" qarşılaşması idi. Bu komandaların hər ikisi kubokda kənarda qaldığı üçün avrokuboklara şansları yalnız çempionat yolu ilə qalıb. Qərb təmsilçisi evdə oynamağına baxmayaraq inamsız göründü. "Zirə" qələbəni daha çox istəyirdi. Kubokdakı məğlubiyyətdən sonra oyuna yaxşı köklənə bilmişdilər.
"Sabah" - "Araz Naxçıvan" qarşılaşması çox maraqlı keçdi. İki komanda bir xalla kifayətləndi. Hər iki komanda hücumda yaxşı oynasalar da, müdafiədə boşluqlar var idi.
"Kəpəz" "Neftçi" qarşılaşmasında meydan sahiblərinə qələbə vacib lazım idi və bunu qazandılar. "Neftçi" ən zəif oyunlarından birini oynadı. Hücumda "dişsiz" idilər. Amma "Kəpəz" daha istəkli idi, qolu vurandan sonra hesabı qorumağa çalışdı".
Qeyd edək ki, Premyer Liqanın XXVI turuna martın 8-də start veriləcək.
