Sport24.az
"Neftçi" - "Sumqayıt" komandaları arasındakı oyunlar son zamanlar prinsipial xarakter daşıyır. Turnir cədvəlində bir-birilərinə yaxın klublardır. Oyunun gedişi qarşılaşmanın heç-heçə bitəcəyinndən xəbər verirdi. Qol epizodları da çox deyildi. Sonda "Neftçi" penaltidən qol vurub qələbə qazandı və "Sumqayıt"dan bir qədər uzaqlaşdı". Bu sözləri Sport24.az-a açıqlamasında Arif Əsədov deyib.
Təcrübəli mütəxəssis Misli Premyer Liqasının 24-cü turunda baş tutan matçları şərh edib:
"Qarabağ" "Sabah"la oyuna aktiv başladı. Qol vuruldu, epizodlar oldu. Sonradan "Sabah"ın şansları yarandı. Hətta qalib də gələ bilərdilər. Heç-heçəni ədalətli nəticə hesab edirəm.
"Araz Naxçıvan" liderlər, "Səbail" isə autsayder qrupunda yer alıb. Meydanda bərabər səviyyəli mübarizə getdi. İkinci dövrə başlayandan Naxçıvan təmsilçisinin oyununda eniş hiss olunur, "Səbail"də isə əksinə. Komandanın oyununda inkişaf var. Bir qolluq matç idi. Kim vursaydı, qalib gələcəkdi. Məncə, "Səbail" vacib bir xal qazandı. "Araz Naxçıvan" isə növbəti dəfə xal itkisi ilə rəqiblərini özünə yaxınlaşdırdı.
"Şamaxı" - "Turan Tovuz" qarşılaşmasında hava şəraiti hər iki komanda üçün əlverişsiz idi. Hətta, oyun keçirilməyə bilərdi. Meydanda daha çox mübarizə getdi. Bir qol hər şey həll etdi. "Turan Tovuz" vacib qələbə qazandı. "Şamaxı" isə məğlub olmaqla Premyer Liqada qalmaq şansını bir az da çətinləşdirdi".
Qeyd edək ki, "Zirə" - "Kəpəz" matçı təxirə salınıb. Buna meydançanın qarla örtülməsi səbəb olub. Peşəkar Futbol Liqasının qərarına əsasən matç bu gün Zirə İdman Kompleksində keçiriləcək. Qarşılaşma saat 16:00-da başlanacaq.
