"Qarabağ" oyuna yaxşı başlamışdı. "Ayaks"ı düzgün analiz etmişdilər. Rəqibin güclü tərəflərini nəzərə alaraq komandamız oyunu rəqib zonasında keçirirdi. Bu da effekt verirdi. İlk 10 dəqiqə "Qarabağ" "Ayaks"ı təzyiq altında saxlayırdı". Bu sözləri Sport24.az-a açıqlamasında Arif Əsədov Avropa Liqasının III turunun "Qarabağ" – "Ayaks" oyununu (0:3) şərh edərkən deyib.
Təcrübəli mütəxəssis "Qarabağ"ın məğlub olmasının əsas səbəbini Julio Romaonun qırmızı vərəqə almasında görüb:
"Oyunun qırılma anı Julio Romaonun lazımsız yerə qırmızı vərəqə alması idi. "Ayaks" kimi komandaya qarşı 10 nəfərlə oynamaq çox çətindir. Pressinq edirsən, fiziki durum aşağı düşür və bu da güc itkisi deməkdir. Amma "Qarabağ" oyun üslubundan dönmədi. Rəqibə təzyiq etməyə çalışırdı. İkinci qoldan sonra isə bütün suallara aydınlıq gəldi".
Əsədov oyunun baş hakiminin "Ayaks"a simpatiyası olduğunu bildirib:
"Hakimin rəqibə simpatiyası olduğu hiss olunurdu. Romaonun qırmızı vərəqə almasında ilk növbədə futbolçunun səhv addımını qeyd etmək lazımdır. Topa yaxın idi. Nədənsə rəqib futbolçuya qarşı kobud oynadı. Sadə oynayıb, topu qapıçıya ötürmək olardı. Avrokubok oyunlarında hakimlər bu cür səhvləri bağışlamır. "Ayaks"ın qazandığı penalti epizodunda tərəddüd etmək olar. İkili mübarizə idi, verməyə bilərdi. Dediyim kimi, bəzən hakimlər böyük komandalara simpatiya göstərir. Elvin Cəfərquliyevin meydandan qovulmasında sonra emosiyalar yüksək həddə çatmışdı".