Sport24.az
"Maraqlı oyunlar oldu. Sürpriz nəticələr qeydə alındı. "Neftçi" və "Şamaxı" son turda məğlub olmuşdular. Bu rəqiblər turnir cədvəlində qonşudurlar. Hər iki komandaya qələbə vacib idi. Oyunun əvvəlində "Şamaxı" üstün görünürdü, hesabı aça bilərdi. Hətta, top dirəkdən qayıtdı. Sonradan "Neftçi" oyuna nəzarəti ələ keçirdi və bunun nəticəsi kimi rəqibi məyus etdilər. Digər matçlarla müqayisədə "Neftçi" bu görüşdə daha yaxşı təsir bağışladı". Bu sözləri Sport24.az-a açıqlamasında Arif Əsədov Misli Premyer Liqasının XXI turunun oyunlarını dəyərləndirərkən deyib.
Əsədov turun digər qarşılaşmaları haqda da fikirlərini bölüşüb:
"Sumqayıt" "Araz-Naxçıvan" qarşılaşması gərgin mübarizə şəraitində keçdi. Açıq futbol izlədik. Heç-heçə ədalətli nəticə idi. "Turan Tovuz" "Qarabağ"a qalib gəldikdən sonra "Səbail" ilə oyunda favorit görünürdü. İlk hissədə Tovuzlular üstünlük əldə etsələr də, onların əleyhinə işləyən məqam qırmızı vərəqə oldu. Bundan sonra "Səbail" üstünlüyü ələ alıb qol vurdu. "Səbail"in son 3 turda göstərdiyi performans yaxşıdır. "Turan Tovuz" bu oyunda 2 xal itiməklə "Qarabağ"ı məğlub etməyin üstündən xətt çəkdi. "Kəpəz" "Sabah" oyununda fərqli hissələr oldu. Gəncə klubu hesabda iki dəfə geridə olmasına baxmayaraq, geridönüş edə bildi. Təbii ki, burda "Sabah"ın futbolçusunun lazımsız qırmızı vərəqə alması da rol oynadı. "Zirə" "Qarabağ" oyunun dramatik keçdi. İlk hissədə "Qarabağ" iki top fərqi ilə önə keçsə də, hesabı sona qədər qoruya bilmədilər. Fasilədə meydan sahiblərinin baş məşqçisi Rəşad Sadıqov nə tapşırıq verdisə, komanda ikinci hissəyə tam fərqli çıxdı. Görünən odur ki, "Qarabağ"da psixoloji eniş var. Məncə, növbəti turlarda daha ideal "Qarabağ" görəcəyik".
