Arif Əsədov: "Futbolçuları itirmək olmaz"

"Estoniya ilə məğlubiyyətdən sonra komandamızda psixoloji eniş var idi. Slovakiyaya qarşı oyunda qol buraxana qədər millimiz inamsız görünürdü. Qoldan sonra isə üstünlüyü ələ alıb, geridönüş edə bildik. Həmişəki kimi epizodlardan yararlana bilmirdik". Bu sözləri Sport24.az-a açıqlamasında veteran futbolçu Arif Əsədov deyib.

Ötən gün Azərbaycan milli komandası UEFA Millətlər Liqasının oyununda doğma meydanda Slovakiyaya 1:3 hesabı ilə məğlub oldu.

Tanınmış mütəxəssis yığmamızın məğlubiyyətinin əsas səbəbi kimi Mahir Emrelinin qırmızı vərəqə alması kimi görüb:

"Oyunun qırılma anı Mahir Emrelinin qırmızı vərəqə alması idi. Bu tip yığmalara qarşı azlıqda oynamaq çətindir. İşimiz çətinləşdi, ardıcıl 2 top buraxaraq məğlub olduq. Ümumi götürsək, futbolçuların əzmkarlığını qeyd etmək lazımdır. Qələbə qazanmaq istəyirdilər. Azlıqda qalmağımız məğlubiyyətə gətirib çıxartdı. Baş  məşqçi tərəfindən oyuna müdaxilə etmək vacib idi. İkinci hissədə 5-li müdafiədən 4-lüyə keçildi. Emin Mahmudovun meydana daxil olması mərkəzdə oyunumuzu yaxşılaşdırdı. Oyunun gedişində sarı vərəqə alan futbolçular var idi. Mahir zədədən sonra indi-indi özünə gəlir. Sarı vərəqəm almışdı. Emrelinin əvəzləmək lazım idi ki, yekunda meydandan qovulmasın".

A. Əsədovun fikirlərinə görə, yığmamızın heyətinə gənc futbolçuları dəvət etmək lazımdır:

"Ötən üç ilə baxanda yüksəliş hiss olunurdu. Son 4 oyunda məğlubiyyətlər yenidən başlamalı olduğumuzu göstərir. Fernando Santuş vaxt istəyir. Futbolçuların sayını və yaşını nəzərə alsaq, hər dəfə vaxt istənildikcə geridə qalırıq. Heyətə gənc futbolçuları cəlb etmək lazımdır. Oynamasalar belə, abu-havanı hiss etməlidirlər. Şəhriyar Əliyev, Xəyal Nəcəfov və bir neçə futbolçu yığmaya çağrıldı, oynamadılar. Mütləq hamıya şans vermək lazımdır. Az sayda futbolçularımız kənarda oynayır. Mən baş məşqçi olanda Ukraynadan Emin Mustafayevi gətirdik. Gələcəyi potensiallı futbolçu kimi baxırdıq. Onun son oyunlar üçün dəvət almaması mənim üçün sualı doğurdu. Futbolçuları itirmək olmaz. Bacardığmız qədər onların sayını artırmalıyıq".