Arif Əsədov: "Daha qapalı oyun üslubuna keçdilər"

"Qarabağ" istəsəydi, daha yaxşı nəticə əldə edə bilərdi". Bunu Sport24.az-a açıqlamasında Arif Əsədov deyib.

Millinin sabiq məşqçisinin fikirincə, İsveç təmsilçisi ilə görüşdə "Qarabağ"ın müdafiəçiləri Medina və Bəhlulun yoxluğu komanda üçün ciddi çətinliklər yaradıb:

"Qarabağ" matçın böyük hissəsində üstün oynadı. Yalnız ikinci hissənin ilk 10-15 dəqiqəsində rəqib daha aktiv təsir bağışladı. Bu dövrdə rəqib təzyiq yaradaraq hesabı açdı. Qolu vurduqdan sonra isə müdafiəyə çəkilərək daha qapalı oyun üslubuna keçdilər və əsas diqqəti hesabı qorumağa yönəltdilər. Onların strategiyası əsasən əks-hücumlara söykənirdi.

Təcrübəli mütəxəssis dünən baş tutan qarşılaşmanın hər iki komanda üçün böyük əhəmiyyət daşıdığını da vurğulayıb: "Qarabağ" üçün qazanılacaq 3 xal, xüsusilə növbəti mərhələyə yüksəlmək baxımından vacib idi. Komanda istəsəydi, daha yaxşı nəticə əldə edə bilərdi. Bununla belə, müdafiədə əsas oyunçular – Medina və Bəhlulun olmaması müəyyən çətinliklər yaradırdı. Silva özünə yad mövqedə oynasa da, performansı pis deyildi. Amma açıq şəkildə görünürdü ki, Medina və Bəhlulun keyfiyyəti daha üstündür.

Təəssüf ki, təmsilçimiz qələbə qazana bilmədi. İndi isə bütün diqqətini növbəti oyunlara yönəltməlidi. Gedişatdan asılı olaraq, 6 xal  "Qarabağ"ın mərhələni keçmək üçün kifayət edə bilər".

Qeyd edək ki, dünən keçirilən "Elfsborq" - "Qarabağ" matçı meydan sahiblərinin 1:0 hesablı qələbəsi ilə yekunlaşıb.