Arif Əsədov: "Bunu faciəyə çevirməməliyik"

"Qarabağ"ın bu il avrokuboklardakı çıxışı ilə bağlı çox müzakirələr olub, fikirlər bildirilib. Təbii ki, nəticələr futbol ictimaiyyətinin, "Qarabağ"ın məşqçilər korpusunun istədiyi kimi olmadı. Bunun da müxtəlif səbəbləri var". Bu sözləri Sport24.az-a açıqlamasında millinin sabiq məşqçisi Arif Əsədov deyib.

Təcrübəli mütəxəssisi ağdamlıların cari mövsüm Avropa Liqasındakı çıxışına toxunub:

"Zədəli oyunçular oldu, turnir yeni formatda keçirilir. Belə formatda bəzi adlı-sanlı klubların da çıxışı sual doğurdu. Bundan başqa, "Qarabağ"da qeyri-stabil oyunun səbəblərindən biri də komandadan gedənlər idi. Juninyonun gedişi, yeni transferlərin tam uyğunlaşmaması. Bu proseslər komandanın çıxışına təsir etdi.

Amma bunu faciəyə çevirməməliyik. "Qarabağ"a hər zaman dəstək olmalıyıq. Neçə illərdir ki, Azərbaycanı Avropada təmsil edir. Səhvləri analiz edərək irəli baxmaq lazımdır. Bunu baş məşqçi Qurban Qurbanov və klub da yaxşı bilir. Artıq bu matçlar göstərdi ki, komandada çatışmayan cəhətlər nədir. Futbol getdikcə yüksəlir. Nəticə qazanmaq üçün o standartlara uyğun strategiya qurmalısan. Bu uğursuzluğu yaddan çıxarıb növbəti ili düşünməliyik.

Əsədov komandanın Yunanıstanda "Olimpiakos"a 0:3 hesabı ilə uduzduğu qarşılaşma haqqında da danışıb:

"Olimpiakos"la oyunun birinci hissəsində bərabər səviyyədə mübarizə apardı. Amma ikinci yarıda rəqibin təzyiqi səhvlərə məcbur etdi. Çempionatlarımızın səviyyəsi eyni deyil və rəqibin büdcəsi də "Qarabağ"dan yüksəkdir. Bu reallıqları nəzərə almalıyıq".

Qeyd edək ki, "Qarabağ" Liqa mərhələsini 3 xalla sonuncu - 36-cı pillədə başa vurub.