Arif Əsədov: "Bu matç barədə proqnoz vermək çətin idi"

"Birinci oyundan sonra "Qarabağ"ın "Səbail"i üstələyərək növbəti mərhələyə yüksələcəyi aydın idi. Ağdam təmsilçisi məsələni həll etmişdi. Cavab görüşünün əvvəli bərabər səviyyədə keçdi. İkinci hissədə ustalıq öz sözünü dedi". Bu sözləri Sport24.az-a Azərbaycan millisinin sabiq məşqçisi Arif Əsədov deyib.

Təcrübəli mütəxəssis Azərbaycan Kubokunun 1/4 final mərhələsinin cavab oyunları ilə bağlı fikirlərini bölüşüb:

"Qarabağ" layiqli qələbə ilə yarımfinala yüksəldi. Təbii ki, "Səbail"in əsas fikri çempionata yönəlib. Komanda elitada qalmaq istəyir"

Əsədov ilk qarşılaşmadakı qolsuz heç-heçədən sonra "Sumqayıt" - "Sabah" (0:4) görüşünün maraqla gözlənildiyini söyləyib: "Amma qarşılaşmanın ilk yarısı da bərabət səviyyədə keçdi. Burada əsas bir qol məsələni həll edirdi. "Sabah" hesabı açdıqdan sonra artıq rəqibin işini çətinləşdirdi. Çünki "Sumqayıt" neçə oyundur qol vura bilmir. İkinci qoldan sonra heç bir şübhə qalmadı. 4:0 hesablı qələbə gözlənilməz olsa da, "Sabah" layiqli qalibiyyət əldə etdi. Kubokda irəliləmək bakılılara daha çox vacib idi. "gənclik şəhəri" təmsilçisi də çempionatda qalmağı düşünür".

Mütəxəssis "Neftçi"nin də cütün taleyini "Qarabağ" kimi öncədən həll etdiyini bildirib: "Neftçi" - "Kəpəz" (1:0) oyununda qarlı hava idi, şərait yaxşı deyildi. Amma "Neftçi" ilk dəqiqədən meydana motivasiyalı çıxdı. "Ağ-qaralar"a üçün də kubok avrokuboklar baxımından önəmlidir". "Zirə" - "Araz-Naxçıvan" (0:2) matçına gəlincə, burada şanslar bərabər idi. Bu matç barədə proqnoz vermək çətin idi. İlk dəqiqələrdə vurulan penalti "Araz-Naxçıvan"ın şanslarını daha da çoxaltdı. Bəlkə də göznəlilməz nəticə bu oyunda qeydə alındı. İlk dəqiqələrdəki 11 metrlik cərimə zərbəsi cütün taleyini həll etdi".

Qeyd edək ki, Azərbaycan Kubokunda yarımfinal oyunları apreldə təşkil ediləcək.