Sport24.az
"Dünənki oyundan da qabaq fikirlər belə idi ki, "Qarabağ" "Şkendiya"dan üstündür, iki oyunun nəticəsinə görə rəqibi üstələyəcək". Bu sözləri Spor24.az-a açıqlamasında Arif Əsədov deyib.
Təcrübəli mütəxəssis Azərbaycan çempionunun Şimali Makedoniyada "Şkendiya"ya qalib gəldiyi (1:0) Çempionlar Liqasının III təsnifat mərhələsinin ilk oyunu ilə bağlı fikirlərini bölüşüb:
"İlk matç göstərdi ki, Ağdam təmsilçisi bütün meyarlarda rəqibdən üstündür. İlk hissədə təmsilçimiz yaxşı oyun nümayiş etdirdi. Rəqib intizamlı komandadır. Oyunçu keyfiyyəti, xüsusilə də hücum fazasında çatışmazlıqlar hiss olunur. Hiss olunur ki, "Qarabağ"dan çəkinirlər. İkinci yarıda böyük qüvvə ilə hücuma çıxa bilmirdilər. "Qarabağ" artıq 70 faiz növbəti mərhələyə vəsiqəni həll edib. Gələn həftə doğma meydanda da rəqibə ilk dəqiqələrdən ciddi yanaşıb, ilk hissədə oyunun taleyini həll etmək lazımdır. Məncə, "Qarabağ" növbəti mərhələyə vəsiqəni təmin edib".
Qeyd edək ki, komandalar arasında cavab oyunu avqustun 12-də Bakıda keçiriləcək.
