Sport24.az
"Səfərdə əldə olunan qələbədən sonra "Qarabağ"ın Bakıda "Şkendiya"nı üstələyəcəyi bəlli idi. Hətta, böyükhesablı qələbə gözlənilirdi ki, belə də oldu". Bu sözləri Sport24.az-a açıqlamasında Arif Əsədov deyib.
Təcrübəli mütəxəssis "Qarabağ"ın UEFA Çempionlar Liqasının III təsnifat mərhələsinin cavab görüşündə "Şkendiya"nı 5:1 hesabı ilə darmadağın edərək pley-offa vəsiqə qazanmasına münasibət bildirib:
"Düzdür, ilk qolu Ağdam təmsilçisi buraxsa da, amma komanda sürəti və hücumları artırdı, qollar ardıcıl gəldi. "Qarabağ" artıq ilk hissədə bütün suallara aydınlıq gətirmişdi. Komanda zaman keçdikcə öz oyununu yaxşılaşdırır, keyfiyyəti artırır. Yeni gələn futbolçular heyətə alışmağa başlayır. Bu baxımdan "Qarabağ"ın yaxşı şansı var ki, Çempionlar Liqasının Liqa mərhələsində ölkəmizi təmsil eləsinlər. Ümid edirəm ki, hər şey "Qarabağ"ın istədiyi kimi gedəcək".
Qeyd edək ki, Qurban Qurbanovun komandası "Ferentsvaroş"la ilk oyununu avqustun 19-da səfərdə keçirəcək. Cavab qarşılaşması isə avqustun 27-də Tofiq Bəhramov adına Respublika stadionunda baş tutacaq.
