Idman.biz
"Qarabağ"ın "Şkendiya" qarşısında şanslarını yüksək qiymətləndirirəm".
İdman.biz xəbər verir ki, bu sözləri AZƏRTAC-a açıqlamasında UEFA-nın Bakıda keçirilən məşqçi kurslarında təlimatçı kimi çalışan Arif Əsədov "Qarabağ"ın UEFA Çempionlar Liqasının III təsnifat mərhələsində Şimali Makedoniyanın "Şkendiya" klubu ilə bu gün keçirəcəyi ilk oyun barədə danışarkən deyib.
Mütəxəssis bildirib ki, Ağdam təmsilçisi təcrübə, maliyyə və futbolçuların keyfiyyəti baxımından rəqibdən üstündür: "Sözsüz ki, Çempionlar Liqasında iştirak edən heç bir komanda zəif olmur. "Şkendiya" "Qarabağ"a meydan oxuyan Rumıniyanın FKSB klubuna qalib gəldi. Bu məqamı unutmamaq lazımdır. Görünən odur ki, möhkəm kollektivdir. Ona görə də bu rəqibə ciddi yanaşmaq lazımdır. Ancaq ümumi götürdükdə "Qarabağ" "Şkendiya"ya nisbətən daha komplektləşmiş və sabit komandadır. Ağdam klubu uzun illərdir avrokuboklarda iştirak edir, müxtəlif səviyyəli rəqiblərlə qarşılaşıb və ciddi təcrübə toplayıb. Bu amil hazırkı mərhələdə çox vacib rol oynaya bilər. Lakin təmsilçimiz üçün heç də asan olmayacaq. Çünki "Qarabağ" hələ ideal formasında deyil və bu da müəyyən çətinliklər yarada bilər. Amma bilirik ki, Qurban Qurbanovun komandası turnir ərzində oyundan-oyuna inkişaf edərək tempini artırır".
O, "Qarabağ"ın növbəti mərhələdə qarşılaşacağı potensial rəqiblər barədə də fikirlərini bölüşüb: "Bu mərhələni keçsələr, pley-offda "Ludoqorets" (Bolqarıstan) – "Ferensvaroş" (Macarıstan) cütünün qalibi ilə üz-üzə gələcəklər. Öncədən nəsə demək çətindir. İlk növbədə Şimali Makedoniya klubunu üstələmək lazımdır. "Qarabağ" bu cür təzyiqlərə və rəqabətə öyrəşib. Artıq neçə illərdir avrokubokların qrupunda çıxış edirlər. Ona görə də rəqibin kimliyinin önəmi yoxdur. Azərbaycan çempionu avrokuboklarda potensial rəqiblərindən daha çox oyun keçirib və daha yaxşı nəticələrə imza atıb".
Əsədovun sözlərinə görə, heyətə yeni qoşulan futbolçuların tez bir zamanda komandaya uyğunlaşması oyun keyfiyyətinə müsbət təsir göstərəcək: "Yeni transferlər komandanın gücünə güc qatmalıdırlar. Onların mümkün qədər tez uyğunlaşması çox önəmlidir. Çünki qarşıda daha çətin və məsuliyyətli matçlar var. Ümid edirik ki, təmsilçimiz öz oyununu daha da yaxşılaşdıracaq".
Qeyd edək ki, Skopyedə yerləşən "Todor Proeski" stadionunda keçiriləcək "Şkendiya" - "Qarabağ" görüşü Bakı vaxtı ilə saat 22:00-da başlayacaq. Komandalar arasında cavab qarşılaşması bir həftə sonra Bakıda olacaq.
İdman.biz
