Arif Əsədov: "Qarabağ" evdə "Nyukasl"a qalib gələ bilər

"Təbii ki, rəqib güclüdür. "Nyukasl" dünyanın ən güclü çempionatının təmsilçisidir. Bu səbəbdən "Qarabağ"ı çətin oyun gözləyir". Bu sözləri Sport24.az-a açıqlamasında Arif Əsədov deyib.

Təcrübəli mütəxəssis "Qarabağ"ın Çempionlar Liqasının pley-off mərhələsində "Nyukasl"a qarşı matçdan gözləntilərini bölüşüb:

"Təbii ki, onların və bizim çempionatı müqayisə etmək düzgün deyil. Amma doğma meydanda oynayırıq. Azarkeş dəstəyi bizim üstünlüyümüzdür. Təmsilçimizin oturuşmuş bir heyəti, oyun planı var. Hansı ki, komanda şəkilində nə etmək istədiklərini daha yaxşı bilirlər. Rəqibin matçlarını izləmişəm. Dinamik oyuna üstünlük verirlər. Anlaşma baxımından isə, hiss olunur ki, hələ də problemlər var. Hücuma çıxarkən müdafiədə boşluqlar verirlər. "Qarabağ" evdə "Nyukasl"a qalib gələ və ya heç-heçə edə bilər. Səfərdəki duel isə, çox çətin olacaq.

Əsədov rəqibin heyətindəki itkilərin həlledici olmayacağını bildirib:

"Rəqibin heyətindəki itkilər həlledici ola bilməz. "Nyukasl" İngiltərə klubudur və onlarda bərabər səviyyəli iki heyət var ki, hər zaman futbolçular bir-birini layiqincə əvəz edə bilər. Çempionatda oyunlarına baxanda qeyri-stabil çıxış edir. Son zamanlar məğlubiyyətləri çoxdur. Komandanın üzərində təzyiq var. Əgər "Qarabağ" "Nyukasl"la qalib gəlsə, rəqibin baş məşqçi postunda dəyişiklik qaçılmazdır".

Qeyd edək ki, matç fevralın 18-də Tofiq Bəhramov adına Respublika stadionunda keçiriləcək və saat 21:45-də başlayacaq. Cavab görüşü isə fevralın 25-i, saat 00:00-da start götürəcək.