Idman.biz
"Qarabağ" 8 qarşılaşmada 3–4 xal toplaya bilsə, bu nəticəni qənaətbəxş hesab edə bilərik".
İdman.biz xəbər verir ki, bu sözləri AZƏRTAC-a açıqlamasında UEFA-nın Bakıda keçirilən məşqçi kurslarında təlimatçı kimi çalışan Arif Əsədov "Qarabağ"ın UEFA Çempionlar Liqasının əsas mərhələsində qarşılaşacağı rəqiblər barədə danışarkən deyib.
O bildirib ki, "Çelsi", "Liverpul" və "Napoli" kimi nüfuzlu klublarla üz-üzə gəlmək Ağdam təmsilçisinin böyüməsinə kömək edəcək: "Bu, elə özü böyük uğurdur. "Qarabağ" hədəfinə çataraq əsas mərhələyə vəsiqə qazanıb. Tarixi nəticədir. Çempionlar Liqasında zəif rəqib olmur. Bütün komandalar öz ölkələrinin ən güclüləridir və səviyyə fərqi göz önündədir. Bu səbəbdən "Qarabağ" oyunlara artıq təzyiqsiz çıxacaq, çünki psixoloji gərginlik geridə qalıb və komanda nəhayət daha sərbəst oynaya biləcək".
Mütəxəssisin sözlərinə görə, Qurban Qurbanovun yetirmələrinin ev oyunlarında xal qazanmaq şansı daha çoxdur: "Çelsi", "Ayaks", "Ayntraxt" və "Kopenhagen"lə qarşılaşmalarda "Qarabağ"ın nəticə əldəetmə ehtimalı yüksəkdir. Komanda əvvəllər də bu rəqiblərlə qarşılaşıb. Hətta Danimarka təmsilçisindən üstün olub. Yəni, bu komandaların hər birindən xal almaq mümkündür".
Əsədov səfər oyunlarının daha çətin keçəcəyini deyib: "Liverpul"un meydanında xal qazanmaq real görünmür. Hətta demək olar ki, mümkünsüzdür. "Benfika" da evdə çox güclüdür, bunu "Fənərbağça" ilə görüşdə bir daha sübut edib. Lakin "Atletik" ilə oyun üçün müəyyən ümidlər var. "Qarabağ" vaxtilə Madriddə "Atletiko"dan xal almışdı, bu da əlavə inam yaradır. "Napoli" isə güclü rəqibdir və orada iş çətin olacaq".
O qeyd edib ki, "Qarabağ"ın Çempionlar Liqasının qrup mərhələsinə düşməsi özü-özlüyündə böyük uğurdur: "Komanda bu nəticə ilə Azərbaycan xalqını, futbol ictimaiyyətini və bütün "Qarabağ" camiəsini çox sevindirdi. Baş məşqçi Qurban Qurbanov və texniki heyət də xüsusi təbrikə layiqdirlər. Bu bayramı bizə bəxş etdikləri üçün onlara təşəkkür edirik".
Qeyd edək ki, UEFA Çempionlar Liqasının əsas raundunda ilk turun görüşləri sentyabrın 16-18-də təşkil olunacaq. Pley-off mərhələsinə fevralın 17-18-də start veriləcək. Final qarşılaşması isə mayın 30-da Macarıstanın paytaxtı Budapeştdə reallaşacaq.
İdman.biz
