İdman.biz
"Təbii ki, 6:0 hesablı məğlubiyyət olduqca acıdır".
Bunu İdman.bizə Azərbaycan millisinin sabiq məşqçisi Arif Əsədov deyib.
O, "Zirə"nin Konfrans Liqasının pley-off mərhələsində "Omoniya" ilə keçirəcəyi cavab matçını dəyərləndirib. Təcrübəli mütəxəssisin sözlərinə görə, bu hesabın revanşını almaq çox çətindir: "Burada əsas məqsəd "Zirə"nin qalib olmasıdır. Bu, həm ölkəmizin reytinqi baxımından, həm də imiclərinə görə önəmlidir. Komanda bu mövsüm avrokuboklarda böyük təcrübə qazandı. Təbii ki, mərhələləri keçdikcə rəqiblər güclənir. Kipr təmsilçisi də olduqca güclü bir komandadır. Buna görə rəqibin gücü bəlli idi, çətin olacağını gözləyirdik. Lakin bu hesabı heç kim nəzərə almamışdı. Düşünürəm ki, bugünkü matçda ən azından qalib gəlmək gücündədirlər. Bütün var gücləri ilə qələbə üçün oynasalar nailiyyət əldə edəcəklərinə inanıram".
Qeyd edək ki, komandalar arasında cavab matçı bu gün "Dalğa Arena"da saat 20:00-da baş tutacaq.
Banuçiçək Hüseynli
İdman.biz
