Idman.biz
"Bu gün meydana çıxacaq hər üç klubumuzun mərhələ keçmək imkanları var".
İdman.biz xəbər verir ki, bu sözləri AZƏRTAC-a açıqlamasında UEFA-nın Bakıda keçirilən məşqçi kurslarında təlimatçı kimi çalışan Arif Əsədov "Sabah", "Zirə" və "Araz-Naxçıvan"ın UEFA Konfrans Liqasının II təsnifat mərhələsində keçirəcəkləri cavab qarşılaşmaları barədə danışarkən deyib.
Mütəxəssis bildirib ki, təmsilçilərimiz arasında ən real şans ilk matçda Moldovanın "Petrokub" kollektivini iki cavabsız qolla məğlub edən "Sabah"dadır: "Növbəti raunda vəsiqəni demək olar ki, 70-80 faiz həll ediblər. Amma bu, heç bir halda arxayınlıq yaratmamalıdır. Oyuna ciddi yanaşmalı, hücum futbolu nümayiş etdirib, qollar vurmalıdırlar. "Zirə" və Xorvatiyanın "Hayduk" komandaları arasında keçiriləcək görüşə gəlincə, burada üstünlük az da olsa, rəqibin tərəfindədir. Çünki Bakıdan qollu heç-heçə ilə qayıtdılar və bu gün doğma meydanda oynayacaqlar. "Zirə"nin rəqibin təzyiqinə necə tab gətirəcəyi sual altındadır. Amma onu da qeyd etmək lazımdır ki, təmsilçimizin bu cür vəziyyətlərdə təcrübəsi var. Ötən il də "Osiyek" kimi iddialı klubu eyni ssenari ilə üstələmişdilər".
Azərbaycan millisinin sabiq baş məşqçisi "Araz-Naxçıvan"ın Yunanıstanın "Aris" komandası üzərində ev qələbəsindən (2:1) sonra daha motivasiyalı oyun nümayiş etdirəcəyinə inandığını söyləyib: "Şansları heç də az deyil. Lakin qarşı tərəf də güclü və istəklidir. Öz meydanında fərqli oyun sərgiləyə bilər. Bu baxımdan Naxçıvan təmsilçisi çətinliklə üzləşəcək. Müdafiədə boşluqlara yol verməməli, taktiki baxımdan oyunu düzgün qurmalıdırlar. Baş məşqçinin verdiyi tapşırıqları yerinə yetirsələr, növbəti mərhələyə adlaya bilərlər".
Qeyd edək ki, "Bank Respublika Arena"da keçiriləcək "Sabah" - "Petrokub" matçı saat 20:00-da, Saloniki şəhərində yerləşən "Kleantis Vikelidis" stadionunda təşkil olunacaq "Aris" - "Araz-Naxçıvan" qarşılaşması saat 22:15-də, Split şəhərindəki "Polyud" stadionunda gerçəkləşəcək "Hayduk" – "Zirə" görüşü isə saat 23:00-da start götürəcək.
İdman.biz
