Idman.biz
"İstək baxımından "Sabah" "Qarabağ"ı üstələyə bilər".
Bunu İdman.biz-ə futbol mütəxəssisi Arif Əsədov deyib.
O, Azərbaycan Kubokunun "Qarabağ"la "Sabah" arasında keçiriləcək finalı öncəsi fikirlərini açıqlayıb. Millinin sabiq məşqçisi bildirib ki, hər iki komandanın qalib gəlmək ehtimalı var: "Bu oyun yalnız "Qarabağ" və "Sabah" üçün önəm daşımır. "Turan Tovuz" və "Zirə" üçün də böyük əhəmiyyət daşıdığı üçün bizi maraqlı oyun gözləyir. Final oyununda favorit olmur. Təbii ki, "Qarabağ" futbolçularının ustalığına görə, "Sabah"ı üstələyir. Amma Bakı təmsilçisinin avrokuboklarda iştirakı üçün qələbə qazanması vacibdir. Bu baxımdan meydana daha motivasiyalı çıxacaqlar. Buna baxmayaraq, şansların bərabər olduğunu düşünürəm".
Əsədov finalın Mehdi Hüseynzadə adına Sumqayıt şəhər stadionunda keçirilməsini müsbət məqam kimi vurğulayıb: "Bu oyun kubokun digər finallarından azarkeş sayına görə fərqlənəcək. Həm "Qarabağ", həm "Sabah"ın, həm də Sumqayıtda futbol azarkeşləri birləşib möhtəşəm bir ab-hava yaradacaq. Gözəl bir futbol bayramı izləyəcəyik. Güclü olan qalib gəlsin".
Qeyd edək ki, "Qarabağ" - "Sabah" görüşünə 5000-dən çox bilet satılıb. Mayın 31-də keçiriləcək final görüşünün start fiti saat 19:00-da səslənəcək.
Aytac Sahəd
İdman.biz
