Arif Əsədov deyib: "Ayxan Abbasovun milliyə önəm verməsi çempionatdakı uğurlara təsir göstərir"

"Səbail" - "Turan Tovuz" oyununda qələbə daha çox qonaqlara vacib idi ki, avrokuboklar yolunda mübarizəni davam etdirsin. Tovuzlular turnir cədvəlində özündən aşağıda olan komandalarla mübarizədə çətinlik çəkdiyini bir daha nümayiş etdirdi. "Səbail"in isə elitadan düşmək şansı 60-70 faizdir, amma sona qədər mübarizə aparmaq niyyətindədirlər". Bu sözləri Sport24.az-a açıqlamasında Arif Əsədov deyib.

O, Misli Premyer Liqasının XXIX turunda baş tutan qarşılaşmaları şərh edib:

"Turun sürpriz nəticəsi Masazırda oldu. "Sabah" "Kəpəz"ə minimal hesabla məğlub oldu. "Sabah"ın dördüncü yer uğrunda mübarizə aparmasına şans var idi. Əllərinə düşən fürsətdən istifadə edə bilmədilər. "Kəpəz" isə bir gün əvvəl "Səbail"in xal qazanmasından sonra meydana daha istəkli çıxmışdı. Qələbə qazanaraq Premyer Liqadakı yerini möhkəmləndirdilər. "Sabah" isə fikirini daha çoxc kuboka yönəltməlidir".

Təcrübəli mütəxəssis lidrlərin oyun barədə də fikirlərini bölüşüb:

"Turun mərkəzi matçında dinamik futbol izlədik. Hər iki komanda öz məqsədinə böyük ölçüdə çatmasına baxmayaraq, əsas heyətlə meydana çıxmışdılar. Gərgin mübarizə getdi. Bəlkə də oyunun ədalətli nəticəsi heç-heçə olardı.

"Şamaxı" - "Neftçi" oyununda bolqollu, keyfiyyətli oyun görməsək də, daha çox mübarizə izlədik. "Neftçi" 3 xal qazanmaqla 4-cü yer uğrunda mübarizədə şansını daha da artırdı. "Şamaxı" ardıcıl iki matçdır məğlub olur. Görünən odur ki, Ayxan Abbasovun milliyə diqqət ayırması çempionatdakı nəticələrə təsir edir.

"Araz-Naxçıvan" - "Sumqayıt" oyununda favorit meydan sahibləri idi. Naxçıvanlılar qalib gəlməyə məcbur idi ki, "Sabah" və "Turan Tovuz" xal itirmişdilər. Qazanılan 3 xal 3-cü yerdəki mövqeyini daha da möhkəmləndirdi. "Sumqayıt" isə Premyer Liqada qalmaq məqsədinə çatıb. Vaqif Cavadov gənc futbolçulara şans verib, onları yoxlayır".