Sport24.az
Türkiyəli mütəxəssis Arda Turanın baş məşqçisi olduğu Donetsk "Şaxtyor"u UEFA Konfrans Liqasının Liqa mərhələsində növbəti qələbəsini qazanıb. Sport24.az xəbər verir ki, Ukrayna klubu 4-cü turda səfərdə İrlandiyanın "Şemrok Rovers" komandasına 2:1 hesabı ilə qalib gəlib.
Bu nəticədən sonra xallarını 9-a çatdıran "Şaxtyor" 4-cü pilləyə yüksəlib. İndi onları lider "Samsunspor"dan (Türkiyə) cəmi 1 xal ayırır.
Donetsk təmsilçisinin baş məşqçisi Arda Turan oyundan sonra keçirilən mətbuat konfransında səfər qələbəsini şərh edib. O, gənc futbolçura da bu görüşdə şans verdiyini və bunun da çox vacib olduğunu bildirib: "Burada oynamaq asan deyildi, amma matça çox yaxşı başladıq. Rəqibin müdafiəsinə qarşı mübarizə aparmaq üçün planlar hazırlamışdıq və əksər hallarda onları yerinə yetirə bildik. Tez bir zamanda qol vurduq. Qol vurduqdan sonra oyuna nəzarəti ələ ala bildik. Bu gün bütün hücum oyunçularımızdan istifadə etməyə çalışdıq. 17 və ya 18 yaşında dörd-beş futbolçumuz var ki, onlarla bu qələbə xüsusilə mənalıdır. Hesabdan daha çox, hazırda göstərdiyimiz oyun səviyyəsindən məmnunam. Buna görə də oyunçularımı təbrik edirəm".
Qeyd edək ki, "Şaxtyor" Konfrans Liqasında növbəti oyununu dekabrın 12-də səfərdə Maltanın "Hamrun" klubuna qarşı keçirəcək.
