Arda Turan "Şaxtyor"un qələbəsi, motivasiya və heyət dəyişiklikləri barədə danışıb

Ukraynanın "Şaxtyor" klubunun baş məşqçisi Arda Turanın komandası ardıcıl iki derbidən əvvəl vacib psixoloji üstünlük qazanıb.

İdman.Biz xəbər verir ki, Donetsk təmsilçisi Ukrayna Premyer Liqasının 10-cu turunda "Kudrivka"nı 4:0 hesabı ilə məğlub edərək xalını 21-ə yüksəldib və turnir cədvəlinin liderliyinə qayıdıb.

Oyundan sonra baş məşqçi Arda Turan qələbə barədə danışıb:

"Bəzi anlardan razı qaldım, bəzilərindən isə tam olaraq yox. Hətta heç-heçə oynadığımız "Polissya" matçındakı performans bizi daha çox qane etmişdi".

Jurnalistin "Belə oyunlar üçün xüsusi motivasiyaya ehtiyac varmı?" sualına cavab verən Turan, 2008-ci ildə Türkiyə millisinin Malta ilə 2:2 hesablı heç-heçəsini xatırladıb:

"Futbolda hər şey hörmətlə bağlıdır. Hər rəqib analiz edilməlidir, hər oyun eyni ciddiyyətlə qəbul olunmalıdır. Gənc olduğum vaxt Malta ilə oyunda gözlənilmədən xal itirmişdik. Konsentrasiyanı sonadək qorumaq lazımdır. "Dinamo Kiyev"lə qarşılaşmada da bu prinsip keçərlidir".

Türkiyəli mütəxəssis heyətdə etdiyi dəyişikliklərin "rotasiya" kimi dəyərləndirilməsinə də münasibət bildirib:

"Messi, İnyesta, Xavi ehtiyatda oturursa və Arda oynayırsa – buna rotasiya deyə bilərsən. Bizdə vəziyyət fərqlidir. Kollektiv əsasən gənc oyunçulardan ibarətdir və biz onların inkişafı üzərində işləyirik".

Qeyd edək ki, "Şaxtyor" ardıcıl iki dəfə "Dinamo Kiyev"lə qarşılaşacaq:

• 29 oktyabr - Ukrayna Kuboku, 1/8 final

• 2 noyabr - Ukrayna Premyer Liqası

Hazırda "Dinamo Kiyev" 20 xalla "Şaxtyor"u bir xal fərqlə izləyir.

İdman.Biz