Idman.biz
"Real Madrid"in türkiyəli futbolçusu Arda Gülər La Liqada qol fürsətləri yaratmaq üzrə bütün rəqiblərini qabaqlayıb. Gənc futbolçu meydanda keçirdiyi vaxtın nisbətən az olmasına baxmayaraq, bu göstəricidə çempionatın lideridir.
İdman.Biz "StatMuse" statistik platformasına istinadən xəbər verir ki, Gülər 2026/2027 mövsümünün ilk 11 turunda komanda yoldaşları üçün 39 qol fürsəti yaradıb.
Türkiyə millisinin üzvü bu göstəriciyə 11 qarşılaşmada cəmi 654 dəqiqə meydanda qalmaqla nail olub. O, həmin oyunların doqquzunda start heyətində yer alıb.
Gülərin ən yaxın izləyicisi "Rasinq"in futbolçusu İniqo Visentedir. İspaniyalı oyunçu 891 dəqiqədə 32 qol fürsəti yaradıb. "Barselona"nın hücumçusu Lamin Yamal 901 dəqiqədə 30, "Atletiko"nun yarımmüdafiəçisi Aleks Baena isə 691 dəqiqədə 26 qol fürsəti ilə növbəti pillələrdə qərarlaşıblar.
Maraqlıdır ki, Gülər Visentedən 237, Yamaldan isə 247 dəqiqə az oynamasına baxmayaraq, onların hər ikisini geridə qoyub. Türkiyəli futbolçu ən yaxın izləyicisini yeddi, "Barselona"nın ulduzunu isə doqquz qol fürsəti qabaqlayır.
Meydanda keçirilən vaxta görə hesablandıqda fərq daha da nəzərə çarpır. Gülər hər 90 dəqiqədə orta hesabla 5,37 qol fürsəti yaradıb. Bu göstərici Visentedə 3,23, Yamaldа 3, Baenada isə 3,39 təşkil edir.
"Real Madrid"in digər ulduzları bu göstəricidə Gülərdən xeyli geri qalırlar. Cud Bellingem və Kilian Mbappe hərəyə 19 qol fürsəti yaradıblar. Beləliklə, Gülər bu göstəricidə hər iki komanda yoldaşını 20 qol fürsəti qabaqlayır.
Türkiyəli yarımmüdafiəçi yalnız fürsət yaratmaqla kifayətlənməyib. O, La Liqada keçirdiyi 11 matçda iki qol vurub və üç məhsuldar ötürmə edib. Beləliklə, futbolçu komandasının beş qolunda birbaşa iştirak edib.
Bu statistika Gülərin "Real Madrid"in hücumlarının qurulmasında mühüm rol oynadığını göstərir. Xüsusilə hər 90 dəqiqəyə düşən qol fürsətlərinin sayında rəqiblərini qabaqlaması onun məhdud oyun vaxtından səmərəli istifadə etdiyini ortaya qoyur.
