Idman.biz
"Hazırda problem yalnız büdcəmizin azlığıdır ki, bizə tam olaraq planlarımızı həyata keçirməyə mane olur. Amma düşünürük ki, buna da alternativ həll yolları tapmaq mümkündür".
İdman.biz xəbər verir ki, bu sözləri futbolinfo.az saytına açıqlamasında II Liqada mübarizə aparan "Araz Saatlı"nın prezidenti Ədalət Abdullayev deyib.
Klub prezidenti bildirib ki, yeni mövsümdə əsas hədəf liqadakı mövqelərini möhkəmlətməkdir: "Yeni mövsüm əsas hədəfimiz liqadakı yerimizi möhkəmlətməkdir. Kifayət qədər yerli, yəni Saatlıdan olan futbolçu bazasını formalaşdırmağa çalışacağıq. Ötən mövsümmkü heyətdən az sayda, əsasən də Saatlıdan olan futbolçuları saxlamışıq. Bütün mövqelərdə boşluqlarımız yaranıb və bunları doldurmaq məcburiyyətindəyik. Mövcud heyəti saxlamadığımız üçün yeni mövsümdə xeyli yeni adlara və yeni simalara şahidlik edəcəksiniz".
Abdullayev komandanın yaxın planlarını da açıqlayıb: "Məqsədimiz mümkün qədər çox xal toplamaq və təhlükəli zonadan uzaq qalmaqdır. Eyni zamanda gənc, perspektivli futbolçulara şans verərək onların təcrübə toplamasına şərait yaratmaq qarşıya qoyduğumuz məqsədlərdəndir. Yeni baş məşqçimiz Elşən Atakişiyev yerli mütəxəssisdir. Uzun illər Saatlıda aşağı yaş qrupları onun rəhbərliyi altında olub. Düşünürük ki, yerli gənclərin formalaşmasında və üzə çıxmasında onun daha çox faydası ola bilər. Peşəkar futbolçu karyerasının olması da əlavə üstünlükdür. O, uzun illərdir bu sahədədir. Biz də ona inanırıq və hər cür dəstək verməyə çalışacağıq".
İdman.biz
