Report.az
"Araz-Naxçıvan"ın UEFA Konfrans Liqasının II təsnifat mərhələsindəki rəqibi "Aris" 111 illik tarixə malikdir.
"Report" xəbər verir ki, adı qədim yunan mifologiyasında müharibə tanrısı kimi qələmə verilən komanda 1914-cü ildə yaradılıb.
Komandanın rəngləri qədim dönəmlərdə Saloniki şəhərinin ərazisində yerləşən Bizans İmperatorluğundan (və ya Şərqi Roma İmperiyası) götürülmüş sarı və qaradır.
Elə ləqəbi də "Savaş tanrısı" olan "Aris" tarixi ərzində 3 dəfə Yunanıstan çempionu (1945/1946, 1931/1932, 1927/1928 mövsümləri) adını qazanıb. Bununla yanaşı, komanda bir dəfə də ölkə kubokunun (1969/1970 mövsümü) sahibi olub.
"Aris" ev oyunlarını 1951-ci ildən fəaliyyətdə olan və 22 800 azarkeş tutumuna malik təbii ot örtüklü "Kleantis Vikelidis" stadionunda keçirir.
Baş məşqçi Marinos Uzunidisin rəhbərliyi altında 2024/2025 mövsümünü beşinci pillədə bitirən kollektiv hazırda UEFA-nın klub reytinqində 195-ci pillədə qərarlaşıb.
Qeyd edək ki, UEFA Konfrans Liqasında II təsnifat mərhələsinin görüşləri iyulun 24-ü və 31-də keçiriləcək. "Araz-Naxçıvan" ilk görüşü evdə, cavab matçını səfərdə keçirəcək.
