Idman.biz
"Matça ciddi hazırlaşmışdıq. Bilirdik ki, rəqib güclü və təhlükəli komandadır".
İdman.biz xəbər verir ki, bu fikirləri AZƏRTAC-a açıqlamasında "Araz-Naxçıvan" klubunun qapıçısı Kristian Avram UEFA Avropa Konfrans Liqasının II təsnifat mərhələsində Yunanıstanın "Aris" kollektivinə 2:1 hesabı ilə qalib gəldikləri ilk oyun barədə danışarkən deyib.
Moldovalı qapıçı ikinci oyunun daha çətin keçəcəyini bildirib: "Hələ heç nə bitməyib. Bizi Yunanıstanda daha ağır oyun gözləyir. Klubun Avropadakı debüt oyununda qələbə qazanması gözəl hissdir. Bunu səfərdə də davam etdirmək istəyirik. İlk qolu biz buraxsaq da, azarkeşlər həvəsdən düşmədilər və sonadək bizi dəstəklədilər. Komandamla qürur duyuram. Əzmkarlıq əla idi".
Qeyd edək ki, komandalar arasında cavab görüşü iyulun 31-də Yunanıstanda keçiriləcək.
İdman.biz
