Idman.biz
"Araz-Naxçıvan"ın yarımmüdafiəçisi Miço Kuzmanoviçin Futbolxeber.az saytına müsahibəsi
- Azərbaycan Premyer Liqasının XXXIII turunda "Sabah"la bərabərə qaldınız. 1:1-lik heç-heçəni necə şərh edərdiniz?
- Maraqlı oyun alındı. Hər iki komanda qələbə qazanmağa çalışırdı. Bizim üçün də vacib matç idi. Qalib gəlsəydik, bürünc medalları qazanmaq yolunda böyük addım atmış olacaqdıq. Yekunda heç-heçə qeydə alındı. Düşünürəm ki, 1:1 ədalətli nəticədir.
- Qələbə qazanmaq üçün nə çatışmadı?
- Yaxaladığımız qol epizodlarını dəyərləndirə bilmədik. Fərqlənmək üçün bir neçə şansımız var idi. Təəssüf ki, ikinci dəfə rəqib qapısına yol tapmaq mümkün olmadı. Hesabı 2:0 etsəydik, işimiz daha asan olardı.
- Artıq neçənci oyundur ki, "Araz-Naxçıvan" hesabı açdıqdan sonra nisbətən geri çəkilir və qapısında qol görür. Bu, nədən irəli gəlir?
- Dəqiq bir söz demək çətindir. Ola bilər ki, psixoloji təzyiqdir. Bəlkə də mövsümün sonudur deyə, güc çatışmır. Hesabı açdıqdan sonra rəqib üstünlüyü ələ alır və fərqlənir. Halbuki hesab arasındakı fərqi artıra bilsək, belədə daha yaxşı nəticələr qazanarıq.
- Sona 3 tur qalıb və "Turan Tovuz"la aranızdakı xal fərqi 6-ya bərabərdir. "Araz-Naxçıvan"ın bürünc medal qazanmaq şansını necə dəyərləndirirsiniz?
- Şansımız kifayət qədər yüksəkdir. Bir qələbə bizə kifayət edə bilər. Sona 3 tur qalıb və hər matçda qələbə qazanmaq istəyirik. Bütün mövsümü ilk üçlükdə keçirmişik. Ona görə də şansımızı əldən verə bilmərik. Var gücümüzü toplayıb qarşıdakı matçlarda yaxşı nəticələr qazanmalı və mövsümü ilk üçlükdə başa vurmalıyıq.
- Növbəti turda artıq çempionluğu təmin edən "Qarabağ"la qarşılaşacaqsınız...
- Çox çətin oyun olacaq. "Qarabağ"ın gücü hamıya məlumdur. Çempion olsalar da, hər matça ciddi yanaşırlar. Ona görə də bizi çox çətin bir qarşılaşma gözləyir.
- Kubokdan fərqli olaraq çempionatda "Qarabağ"a qalib gələ bilməməsiniz. Ağdam klubu ilə mövsümün son matçında uğursuz seriyaya son qoymaq mümkün olacaq?
- Bəli, bu haqda məlumatımız var. "Qarabağ" çox ciddi rəqibdir. Heyətlərində güclü futbolçular var. Onlara qarşı necə oynamaq lazım gəldiyini bilirdik. Qeyd etdiyiniz kimi, "Qarabağ"a qarşı mövsümün son oyunudur. Əlimizdən gələni etməliyik ki, yaxşı nəticə qazanaq.
- Öz çıxışınızı necə dəyərləndirirsiniz? Zədə səbəbindən uzun müddət kənarda qaldınız...
- Təxminən 2-3 ay oynamadım. Bu qədər müddət kənarda qaldıqdan sonra müəyyən çətinliklər olur. İndi özümü yaxşı hiss edirəm. Düşünürəm ki, hazıram. Həm meydana çıxmağa, həm də komandama kömək etməyə.
- Yəqin razılaşarsınız ki, ötən mövsüm daha yaxşı çıxış edirdiniz. Həmin Miço Kuzmanoviçi yenidən nə vaxt görəcəyik?
- Mən də bunu arzulayıram (gülür). Fikrinizlə rzıyam. Bu mövsüm çıxışım tam istədiyim kimi alınmadı. Amma hələ 3 tur var. Bu matçlarda əlimdən gələni edəcəm. İnanıram ki, tezliklə meydanda əvvəlki Kuzmanoviçi görəcəksiniz.
İdman.biz
