Idman.biz
Misli Premyer Liqasının sonuna 2 tur qalsa da, həm qızıl, həm gümüş medalın sahibi, həm də I Liqaya yuvarlanan klub bəllidir.
İdman.biz xəbər verir ki, hələ sahibi müəyyənləşməyən yeganə mükafat bürüncdür.
3-cü yer və Konfrans Liqasına vəsiqəyə iki iddiaçı qalmaqdadır. Amma bürünc böyük ölçüdə "Araz-Naxçıvan"ın öz əlindədir.
Elmar Baxşıyevin yetirmələrinin hesabında 55 xal var. Muxtar Respublika təmsilçisi izləyicisi və yeganə təhlükə olan "Turan Tovuz"u 6 xal qabaqlayır. Bu, son iki tur ərəfəsində böyük üstünlük sayılır.
"Araz-Naxçıvan"ı medaldan cəmi 1 xal ayırır. İki turda qazanılacaq bu xal klubun tarixində ilk medal və avrokuboklarda debüt üçün yetərli olacaq.
Düzdür, komandanı çətin Şamaxı səfəri, ardınca vitse-çempion "Zirə" ilə gərgin qarşılaşma gözləyir. Amma Avropaya bilet üçün bir xal qazanılması kifayət qədər real görünür.
"Araz-Naxçıvan"ın son 2 oyunu:
XXXV tur. "Şamaxı" (s)
XXXVI tur. "Zirə" (e)
"Turan Tovuz"un işi daha çətindir. Qərb təmsilçisi təkcə bürünc və Konfrans Liqasına birbaşa vəsiqə üçün "Araz-Naxçıvan"la mübarizə aparmır. Kurban Berdıyevin yetirmələri eyni vaxtda 4-cü yeri və Konfrans Liqasına nəzəri şansı qorumalıdır. "Sabah"ın nəfəsini az da olsa hiss edən tovuzlular 5 xallıq üstünlüyə malikdir.
"Araz-Naxçıvan"ı keçmək isə hər şeyin maksimal olmasından asılıdır. "Turan Tovuz" son iki turda maksimum xal yığmalı, əsas rəqibi maksimum itki ilə üzləşməlidir.
Qərblilərə Sumqayıt səfərində və "Kəpəz"lə ev görüşündə bir dəfə büdrəməklə bürünc xəyalı ilə vidalaşacaq. Amma iki qələbə də yetərli deyil. Çünki Tovuz klubunun bürüncə çatması üçün naxçıvanlıların da xal toplamaması vacibdir.
"Turan Tovuz"un son 2 oyunu:
XXXV tur. "Sumqayıt" (s)
XXXVI tur. "Kəpəz" (e)
Əgər "Araz-Naxçıvan" iki məğlubiyyət alsa, "Turan Tovuz" iki dəfə qalib gəlsə, xallar bərabərləşəcək. Onda hər şey top fərqindən asılı olacaq. Hazırda bu göstəricidə naxçıvanlılar 4 top öndədir. Amma "Araz-Naxçıvan" iki məğlubiyyət alsa, "Turan Tovuz" iki dəfə qalib gəlsə, bütün nəticələr də minimal fərqli olsa, bu rəqəm də bərabərləşəcək. Amma belə ehtimal çox aşağıdır.
XXXIV turda "Turan Tovuz"un uduzması və "Sabah"ın qələbə qazanması sonunculara 4-cü yer şansını qorumasına səbəb olub. Düzdür, bu pillə ilk baxışdan heç nə vermir. Amma "Qarabağ"ın mayın 31-də kubokun finalında qələbə qazanması 4-cü yeri Konfrans Liqasına aparacaq.
Həmin görüşdə Ağdam klubuna rəqib olacaq "Sabah" avrokuboklara vəsiqəni finaladək təmin etmək üçün "Turan Tovuz"u keçməlidir. 5 xallıq fərqlə yanaşı, qələbə sayı da qərblilərin xeyrinədir.
Ona görə də "Sabah"a yalnız rəqibinin iki məğlubiyyəti və özünün iki qələbəsi lazımdır. Bakılıları "Zirə" və "Neftçi" ilə iki paytaxt derbisi gözləyir. Vasili Berezutskinin yetirmələri üçün 6 xal almaq asan olmayacaq. Amma tovuzluların iki turu xalsız bitirməsi daha çətin görünür.
"Sabah"ın son 2 oyunu:
XXXV tur. "Zirə" (s)
XXXVI tur. "Neftçi" (e)
Qeyd edək ki, XXXV tur mayın 17-18-də, XXXVI tur 23-25-də keçiriləcək.
Vüqar Xeyrullayev
İdman.biz
