Idman.biz
"Bu, situasiyadan asılıdır. Həm də məşqçi dəyişikliyi oldu, deyərdim ki, yeni baş məşqçimiz daha tələbkardır".
Bunu "Karvan-Yevlax"ın futbolçusu Araz Abdullayev sport24.az-a müsahibəsində deyib.
Həmin müsahibəni təqdim edirik.
– İkinci hissədə nə baş verdi ki, hesabı qoruyub saxlaya bilmədiniz?
– Oyuna yaxşı başlamışdıq. Sadəcə, qələbə hesabını qoruyub saxlamaq lazım idi. İkinci hissədə çox erkən qol buraxdıq. Bu oyundan ən azı bir xal götürmək istəyirdik. "Neftçi"də məşqçi dəyişikliyindən sonra onların oyununda və sistemində dəyişiklik olduğu hiss olunur. Həqiqətən son iki matçda bu göründü. Biz də yaxşı mübarizə apardıq. Yenə deyirəm, bu qarşılaşmadan ən azı bir xal götürmək istəyirdik. Qismət... Öz üzərimizdə işləyəcəyik.. Son oyunlarda görünür ki, bu komanda ümid verir. İnşallah, ikinci yarıya yaxşı hazırlaşıb, səhvlərimizin üzərində işləyib, komandamızı Misli Premyer Liqada saxlayacağıq.
– Matçda hesabı açaraq sabiq komandanı cəzalandırdınız. Bu barədə nə deyə bilərsiniz?
– Yox, elə deməzdim (gülür). Mən hətta qoldan sonra da sevinmədim. Hətta azarkeşlərə də, necə deyim, üzrxahlıq kimi olmasın, amma sevinmədiyimi göstərdim. Qol həmişə içdən sevindiricidir, amma "Neftçi" mənim evim kimidir. Uşaqlıqdan orda böyümüşəm. Bəziləri, bəlkə də gənc nəsil, ya da bəziləri bizi bəlkə orda çox görmək istəməyib. Amma mənim "Neftçi"yə qarşı həmişə sevgim var, hörmət bəsləyirəm. Bizim flaqmandır. "Neftçi" "Neftçi"dir, bunu həmişə bilirik. Amma bu gün burdayam, "Karvan-Yevlax"ın şərəfini qoruyuram və əlimdən nə gəlir onu eləməyə hazıram. Bu gün yevlaxlı azarkeşlər nəticələrimizdən narazılıq edirlər, amma maksimum dərəcədə çalışırıq ki, onları sevindirək.
– Həm kapitan, həm də oyun baxımından faktiki olaraq komandanın liderinə çevrilmisiniz. Öz performansınızı necə dəyərləndirirsiniz?
– Bu, situasiyadan asılıdır. Həm də məşqçi dəyişikliyi oldu, deyərdim ki, yeni baş məşqçimiz daha tələbkardır. Bu da son oyunlara yansıyır. Hər bir futbolçuya baxsanız görərsiniz ki, daha rahatdır, oyunda daha çox hərəkət eləyir. Hər kəsin performansı yüksəlib. Çalışırıq, özümü yaxşı hiss edirəm və çalışıram nə qədər gedir, bu performansı daha da artırım.
– Azarkeşlərdən söz düşmüşkən, ötən turdakı məğlubiyyətdən sonra komandanızı fitə basdılar, amma bu gün "Neftçi" ilə oyunda uduzsanız belə, sonda sizi alqışladılar. Sizcə, bu, komandanın əzmkar oyununa görədir?
– Bəli, əlbəttə. Açıq deyim ki, "Qarabağ"la ardıcıl iki ağır oyundan sonra komandamız fiziki olaraq 60-cı dəqiqədən sonra yorulurdu. Həmin dövrdə də "Qarabağ"la iki dəfə qarşılaşmağımız bizə çox ağır yük oldu. Ondan sonra "Şamaxı" ilə üzləşdik, onlar da çox "diş"li rəqibdir, həmişə öndə pressinq edirlər. Orda asan qollar buraxdıq və deyərdim, komanda bir az həvəsdən düşdü. Amma oyunbaoyun hər kəs görür ki, "Karvan-Yevlax" artırır. Biz də bunu saxlamaq istəyirik. Rəhbərlik, fanatlar başa düşməlidir ki, bu bir prosesdir, dözmək lazımdır. Yevlaxlı azarkeşlər yaxşı oynadınsa, alqışlayırlar. Pis oynayıb uduzanda isə səni kim dəstəkləyər? Ancaq ailən, yaxınların. Bu da başadüşüləndir. İndi elə vəziyyətdəyik ki, dözüb, səhvlərin üzərində işləyib bu durumdan çıxa bilərik.
– Bacaracaqsız?
– Bacaracaqsınız deyəndə, biz həmişə çalışırıq.
