İdman.biz
"Qaradağ Lökbatan"da çıxış etməyimin səbəbi formada qalmaqdır".
İdman.biz xəbər verir ki, bunu Azərbaycan kubokunun 1/8 final mərhələsinin "Qaradağ Lökbatan" - "Səbail" matçından (0:2) sonra meydan sahiblərinin futbolçusu, vaxtilə Azərbaycan millisində oynayan Araz Abdullayev apasport.az saytına müsahibəsində deyib.
- Oyuna çox yaxşı başlasanız da, nəticədə məğlub oldunuz. Matçı necə dəyərləndirirsən?
- Premyer Liqa klubuna qalib gəlmək üçün əlimizdən gələni etdik. Komandanın nizam-intizamını qorumağa çalışdıq. Oyuna pis başlamadıq. Sadəcə ikinci hissədə gözləmədiyimiz bir top buraxdıq. Düzdür, bundan sonra toparlanmaq çətin oldu. Lakin düşünürəm ki, pis təsir bağışlamadıq. Gücümüzü daha da artırmalıyıq. Bu gün bütün futbolçular özünü ən yaxşı tərəfdən göstərmək niyyətindəydi. Məşqlərdə çalışdığımız tapşırıqları meydanda reallaşdırmağa cəhd etdik.
- Bu gün sanki komandada əlavə motivasiya var idi...
- Zatən hər zaman belə olub. Premyer Liqa klubuna qarşı oynayanda hamı özünü göstərməyə çalışır. Bizim üçün isə əsas məsələ komanda olaraq mübarizə aparmaq idi.
- Oyun ərzində bir neçə dəfə komanda yoldaşlarına əsəbləşirdin. Bunun səbəbi nə idi?
- Müəyyən məqamlarda ötürmələrdə səhvlərə yol verirdilər. Bunun üçün onlara iradlarımı bildirirdim. Bəzən belə şeylər olur. Futbolda bu cür hallar normaldır.
- "Səbail"in məşqçilər korpusundan həm Cavid Hüseynovla, həm də Elvin Məmmədovla birlikdə futbol oynamısan. Onların təyinatı barədə nə düşünürsən?
- Hər ikisi ilə birlikdə gözəl vaxtlar keçirmişik. Onlara uğurlar arzulayıram. Premyer Liqada daha yaxşı çıxış edəcəklərini, komandanı sonuncu pillədən qurtara biləcəklərini düşünürəm.
- Gələcəklə bağlı planların necədir?
- "Qaradağ Lökbatan"la oynama səbəblərimdən birincisi Amit Quluzadədir. İkinci növbədə isə formada qalmaqdır. Komanda yoldaşlarıma kömək etmək, motivasiya vermək istəyirəm. Yaxşı klublardan təklif olarsa, baxarıq. Özümü yaxşı hiss edirəm. Hələ ki, futbolu bitirməyi düşünmürəm.
İdman.biz
