Idman.biz
"Sabah" - "Levski" oyununda şanslar bərabərdir.
İdman.biz xəbər verir ki, bu sözləri AZƏRTAC-a açıqlamasında Azərbaycanın U-17 yığmasının baş məşqçisi Aqil Nəbiyev UEFA Konfrans Liqasının III təsnifat mərhələsində bu gün cavab oyunlarına çıxacaq "Sabah" və "Araz-Naxçıvan"ın şanslarını dəyərləndirərkən deyib.
O, Bolqarıstan təmsilçisi "Levski"nin "Sabah"la Bakıdakı matçda açıq futbol oynamayacağını bildirib: "İlk matçda "Sabah" tərəfdən böyük səhvlər olmadı. Sadəcə, Valdas Dambrauskas müdafiə futbolu oynatdı. Bu da rəqibin adlı-sanlı olması ilə bağlı idi. Fikrimcə, Bakıda hər iki komanda ehtiyatlı futbol oynayacaq. "Levski"nin rahat mübarizə aparacağına inanmıram. Çünki təmsilçimizin çox yaxşı hücum xətti var. Onlar rəqib üçün baş ağrısı ola bilərlər. Azarkeş dəstəyi də bu gün "Sabah" üçün önəmli olacaq".
Mütəxəssis Kiprdə "Omoniya"nın qonağı olacaq "Araz-Naxçıvan" komandasının növbəti mərhələyə vəsiqə qazanmaq şanslarının çox az olduğunu söyləyib: "Omoniya" Avropa təcrübəsi olan komandadır. Naxçıvan təmsilçisi isə təcrübəsizdir. Buna görə də birinci görüş onlar üçün belə alındı. Futbolda mümkünsüz heç nə yoxdur. "Araz-Naxçıvan" ilk növbədə Azərbaycan futbolunun adına görə oynamalıdır. Kiprdə qazanılacaq qələbə ölkə reytinqinə xal gətirəcək".
"Sabah" Masazırdakı "Bank Respublika Arena"da Bolqarıstanın "Levski" klubu ilə qarşılaşacaq. Ukraynalı baş hakim Mikola Balakinin idarə edəcəyi görüş saat 20:00-da start götürəcək.
Sofiyadakı ilk qarşılaşmada meydan sahibləri minimal hesablı qələbə qazanıblar. Bu cütün qalibi pley-off mərhələsində "AZ Alkmaar" (Niderland) - "Vaduts" (Lixtenşteyn) duelinin güclüsünü sınağa çəkəcək.
"Araz-Naxçıvan" isə Kiprdə "Omoniya" ilə üz-üzə gələcək. Bakı vaxtı ilə saat 21:00-da başlayacaq matçın baş hakimi danimarkalı Yakob Kehlet olacaq. Naxçıvan təmsilçisi Bakıda keçirilmiş ilk görüşdə 0:4 hesabı ilə uduzub. Bu cütün qalibi Avropa Liqasında çıxış edən PAOK (Yunanıstan) - "Volfsberq" (Avstriya) cütünün məğlubu ilə qarşılaşacaq.
İdman.biz
