Idman.biz
Maykl Antonio hesab edir ki, klublar futbolçulara ət kimi yanaşırlar.
İdman.biz xəbər verir ki, "Vest Hem"in və Yamayka millisinin keçmiş forvardı "Nyukasl"la Aleksandr İsak arasında yaşanan gərginlik fonunda futbolçuların sədaqəti və klubların davranışı barədə fikirlərini bölüşüb.
İsveçli hücumçu gələcəyi ilə bağlı qeyri-müəyyənliyə görə komandadan kənarlaşdırılıb. Onunla "Liverpul" maraqlanır.
35 yaşlı Antoni deyir: "Sözlərim insanlara xoş gələ bilər və ya yox, amma yenə də deyəcəyəm. Futbolçu olaraq mən bu oyunda sədaqətin artıq qalmadığını görürəm.
Mən "Vest Hem"də on il keçirdim, elə digər oyunçular kimi. Bu sədaqət artıq daimi deyil və məncə bu düzgündür, çünki klublar da artıq futbolçulara əvvəlki kimi yanaşmır.
Futbolçu kluba niyə sədaqətli olmalıdır? Azarkeşlərə sədaqəti anlayıram, amma kluba sədaqət – futbolçu inkişaf etməyə, həyatını yaxşılaşdırmağa, başqa yerdə çatmayacağı uğurlara nail olmağa çalışırsa... Vəziyyət budur. Məncə, İsak sadəcə daha da yaxşı olmaq istəyir və bunun üçün əlindən gələni edir.
Bu gün futbol klubları futbolçulara ət kimi yanaşırlar. Biz onlar üçün sadəcə ətik. Keyfiyyətdən düşən kimi ya satılırıq, ya da atılırıq.
Əvvəllər futbolçu illərlə klubda olanda onun insani tərəfini görürdünüz. İndi isə hər şey pula bağlıdır: klub üçün nə qədər gəlir gətirə bilər? Əgər klub pulu düşünürsə, futbolçu da bunu niyə düşünməsin?"
İdman.biz
