Idman.biz
"Zirə"nin futbolçusu Anje Mutsinzinin "Futbolpress.az"a müsahibə verib.
İdman.biz həmin müsahibəni təqdim edir:
– Liqada yolunuza məğlubiyyətsiz davam edirsiniz. Nəticələri necə şərh edərdiniz?
– Nəticələr yaxşıdır, amma düşünürəm ki, bundan da yaxşı ola bilərik. Çox xal toplamaq imkanımız var idi. Yenə də sevinirəm ki, zirvədə qalmaq üçün mübarizəmizi davam etdiririk.
– Bu mövsüm Premyer Liqada çıxış edən "İmişli" ilə oyunda xal itirdiniz. Bu kimi itkilər gələcəkdə komandanın əleyhinə vəziyyət yaratmaz?
– Yaxşı oynadıq, qol imkanları yaratdıq. Amma üç xal qazana bilmədik. Buna baxmayaraq, komanda yaxşı mübarizə apardı. Oyunumuz məni qane edir.
– "Zirə" çempionluğa namizədlərdən hesab edilir. İllərdir dominantlıq edən "Qarabağ"ı büdrətmək mümkün olacaq?
– Bəli, inanıram ki, bunu bacaracağıq. Çempion olmaq üçün potensialımız var. Lakin daha artırmalı, çox çalışmalıyıq. Liqada heç bir oyun asan deyil.
– Çox çalışmaqla çempionluğa nail ola bilərsiniz?
– Bu tempdə davam etsək, dominantlıq edə bilərik. Oyunumuzla göstərmişik ki, istənilən komandadan xallar almağa qadirik.
– Azərbaycanda ikinci mövsümünüzü keçirirsiniz. Liqa ilə bağlı fikirləriniz nədir?
– Azərbaycan çempionatı inkişaf edir. Ötən ilə nisbətən bu il oyunlar daha çətindir, rəqabət artıq. Liqaya gələn keyfiyyətli oyunçular var. Onlar da çempionatı gücləndirir.
– Növbəti oyun "Neftçi"yə qarşı olacaq. Matçdan gözləntiləriniz nədir?
– Asan oyun olmayacaq. Rəqibə də xallar lazımdır. Maraqlı, gərgin görüş olacaq. Yaxşı nəticə üçün sona kimi mübarizə aparacağıq.
