Anje Mutsinzi: "Avropa Liqasına getmək şansımız daha yüksəkdir" - MÜSAHİBƏ

"Zirə"nin müdafiəçisi Ange Mutsinzinin Futbolxeber.az saytına müsahibəsi

- Mövsümün son ev oyununda "Sabah"la bərabərə qaldınız. 1:1-lik heç-heçəni necə şərh edərdiniz?

- Düşünürəm ki, yaxşı oyun keçdi. Bunu hər iki komandaya şamil etmək olar. Həm biz yaxşı çıxış etdik, həm də "Sabah". Ona görə də əldə olunan 1 xalı yaxşı nəticə saymaq mümkündür. Həm də bizim üçün çempionatda hər şey həll olunub artı q.

- Fasiləyə qədər "Zirə" rəqibdən üstün olsa da, ikinci hissə barədə bunu demək olmur. Rəqib üstünlüyü ələ aldı, qol da vurdu. Bu, nədən irəli gəlirdi? Motivasiyanın yoxluğu, yoxsa yorğunluq?

- Futbolda belə hallar olur. Bəzən ilk hissədə daha yaxşı təsir bağışlayırsan, nəinki ikinci 45 dəqiqədə. Yaxud əksinə. Amma mən ikinci hissədə rəqibdən böyük ölçüdə geri qaldığımızı düşünmürəm. Biz hər iki hissədə normal futbol sərgilədik. Fasilədən sonra da qol vurmaq üçün şanslarımız oldu. Rəqib sadəcə əlinə düşən bir fürsətdən maksimum istifadə etdi.

- Məlum məsələdir ki, Avropa Liqasına yollanmaq üçün "Zirə" "Qarabağ"ın kuboku qazanmasını istəyir. Ona görə də kimə azarkeşlik edəcəyinizi soruşmayacağam. Neytral mövqedən baxsaq, final üçün şansları necə dəyərləndirərdiniz?

- Düşünürəm ki, maraqlı oyun olacaq. Hər iki komandanın heyətində yaxşı futbolçular var. "Qarabağ" çempionluğunu rəsmiləşdirib. "Sabah" üçün isə bu, son şansdır. Onlar qalib gəlmək üçün hər şeylərini verəcəklər. Odur ki, çox gərgin oyun keçəcək. Məncə, müqayisədə Avroliqaya yollanmaq şansımız daha yüksəkdir.

- "Zirə" ilə müqaviləniz davam edir. Odur ki, sizi növbəti mövsümdə də komandada görəcəyimizi deyə bilərik?

- Bəli, daha bir illik müqaviləm var. Ona görə növbəti mövsümdə də "Zirə"nin uğurları üçün çalışacağam.

- Növbəti mövsüm Azərbaycan Premyer Liqasında legioner limiti ləğv olunur. Sizcə, bu, çempionatın səviyyəsinin qalxmasına gətirib çıxaracaq?

- Əvvəlki mövsümlərlə müqayisədə növbəti çempionatın daha gərgin keçəcəyini düşünürəm. Bütün komandalar limitin ləğvindən faydalanmağa çalışacaq. Gələn çempionat daha baxımlı, daha gərgin olacaq. Bunu artıq indidən söyləmək mümkündür.

İdman.biz