Idman.biz
"Oyundan-oyuna performansımızı artırmağa səy göstəririk, futbolçular bir-birinə daha yaxşı uyğunlaşır və meydanda effektiv əməkdaşlıq qururuq".
Bu sözləri "İmişli"nin belaruslu qapıçısı Andrey Sinenka futbolinfo.az saytına müsahibəsi zamanı deyib.
– Söhbətə 6-cı turda "Zirə" ilə etdiyiniz heç-heçədən (1:1) başlayaq. 24-cü dəqiqədə hesabda önə keçsəniz də, üstünlüyünüzü sona qədər qoruyub saxlaya bilmədiniz. Sizcə, "İmişli" güclü rəqibi ilə dueldə 1 xal qazandı, yoxsa 2 xal itirdi?
– Düşünürəm ki, qarşılaşma hər iki komanda üçün gərgin və mübarizələrlə dolu keçdi. "Zirə" güclü kollektiv olmaqla yanaşı, keyfiyyətli oyunçulara və dəqiq taktiki sistemə malikdir. Belə rəqiblərlə oynamaq həmişə asan olmur, lakin mən bu cür qarşılaşmalardan zövq alıram. Oyunun gedişatını nəzərə alsaq, nəticə qənaətbəxşdir, ancaq ideal sayılmaz. Təbii ki, qarşılaşmanın sonlarında qol buraxmaq xoşagəlməzdir, amma biz irəliyə baxırıq və nəticələrimizi yaxşılaşdırmaq üçün əzmlə çalışacağıq.
– "Zirə" ilə matça qədər Azərbaycan Premyer Liqasında qol buraxmamışdınız. 10-15 dəqiqə də dözə bilsəydiniz, "quru seriya" davam edəcəkdi. Bu barədə nə deyə bilərsiniz?
– Bəli, bu, əlbəttə ki, üzücüdür. Göründüyü kimi, digər bir belaruslu futbolçu ("Zirə"nin hücumçusu Yeqor Boqomolskini nəzərdə tutur – red.) müdafiə xəttimizdə çaşqınlıq yaratdı və bunun nəticəsində qol buraxdıq. Lakin çalışacağam ki, qarşıdakı oyunlarda yenidən uğurlu seriyalar yaradım.
– "İmişli"nin ilk 6 turdakı çıxışını ümumilikdə necə analiz edərdiniz? Komandanızın performansı sizi tam qane edirmi?
– Başlanğıcımız qənaətbəxşdir. Həm müsbət, həm də inkişaf etdirilməli məqamlar mövcuddur. Lakin biz məşqlərdə intensiv çalışır, komanda oyununu və qarşılıqlı əlaqələri davamlı şəkildə təkmilləşdiririk. Oyundan-oyuna performansımızı artırmağa səy göstəririk, futbolçular bir-birinə daha yaxşı uyğunlaşır və meydanda effektiv əməkdaşlıq qururuq. Komanda vəziyyətinə dair dəyərləndirməni isə may ayında aparacağıq.
– Növbəti turda "Araz-Naxçıvan"ın qonağı olacaqsınız. Bu görüşdə şansları necə dəyərləndirirsiniz?
– "Araz Naxçıvan" böyük bir klubdur, yüksək məqsədləri və keyfiyyətli oyunçuları ilə seçilir. Biz isə qarşıdakı görüşə ciddi hazırlaşacaq, hərtərəfli analiz aparacaq və maksimum nəticə göstərməyə çalışacağıq. Qarşılaşmanın nəticəsini isə meydanda verilən mübarizə müəyyən edəcək.
– Baş məşqçi Jorj Kaştilya haqqında da fikrinizi bilmək istərdim. Onu bir məşqçi kimi necə xarakterizə edərdiniz? Kaştilyanın hansı xüsusiyyətlərini daha çox bəyənirsiniz?
– Başlanğıcdakı uğurlar tamamilə onun əməyinin nəticəsidir: gündəlik analizlər, təhlillər, məşqlər və hər bir oyunçu ilə fərdi iş. O, futbolçulara meydanda hər birinin öz vəzifəsini dəqiq və qəti şəkildə izah edir. Futbola və komandaya tam sadiqlik nümayiş etdirir. Komandanı bir məqsəd ətrafında birləşdirib. Biz isə onun əməyinə oyunlarımız və nəticələrimizlə layiqincə cavab verməyə çalışacağıq.
– Azərbaycan çempionatının səviyyəsi haqqında hansı fikirdəsiniz? Çempionatımızda sizə xoş gələn və bəyənmədiyiniz məqamlar hansılardır?
– Çempionatın səviyyəsi kifayət qədər yüksəkdir, lakin inkişaf və təkmilləşmə üçün daim imkanlar mövcuddur. Azərbaycan futbolunun aparıcı klubları ilə ciddi rəqabət yaradan bir çox keyfiyyətli komandalar və fərdi olaraq güclü oyunçular fəaliyyət göstərir. Legionerlərin çoxluğu isə həm rəqabəti, həm də çempionatın ümumi səviyyəsini yüksəldir.
