Idman.biz
"Öz təcrübəmə əsaslanaraq deyə bilərəm ki, yaşadığım yerdə belə bir futbol meydançasının olması böyük bir xoşbəxtlikdir".
İdman.biz Sportnet.az-a istinadən xəbər verir ki, bunu Bakıda səfərdə olan Ukrayna Futbol Assosiasiyasının prezidenti Andrey Şevçenko "FIFA Arena" layihəsi çərçivəsində 247 nömrəli məktəbdə inşa edilən futbol meydançasının açılış mərasimində deyib.
Əfsanəvi futbolçu bildirib ki, burada yaradılan gözəl meydança özü üçün də sevinc mənbəyidir: "Bu stadion Bakının uşaqları üçün unikal fürsətdir. İnanıram ki, bu stadion uşaqlara çox müsbət təsir göstərəcək".
Azərbaycan xalqına, AFFA-ya, Elm və Təhsil Nazirliyinə təşəkkürünü bildirən Şevchenko qeyd edib ki, bu təşəbbüs FIFA prezidenti Canni İnfantinonun dəstəyi ilə reallaşıb və uşaq futbolunun gələcəyi üçün çox vacibdir: "Mən Kiyev kənarında böyüyəndə daim daha yaxşı futbol meydançasının arzusunda idim. Bu gün isə Bakının uşaqları üçün unikal bir fürsət yaradılıb. Azərbaycanın gözəl və xoş təəssüratlı ölkədir. İlk dəfədir burada oluram və çox xoş təəssüratım var. Futbol təhsili və ümumiyyətlə təhsil gənc nəsil üçün vacibdir. Bu layihə uşaqlar üçün əhəmiyyətlidir. Meydança uşaqların həm idman, həm də həyat təhsili üçün mühüm rol oynayacaq".
İdman.biz
