Idman.biz
Bir müddət əvvəl Portuqaliyanın "Akademiko" futbol klubunda çıxış edən braziliyalı hücumçu Andre Klovisin "Qarabağ" klubunun transfer hədəfində olması barədə məlumat vermişdik.
İdman.Biz xəbər verir ki, Klovisin adı bir neçə ölkənin klublarının transfer siyahısına da düşüb.
28 yaşlı forvardla Azərbaycanın "Qarabağ" klubu ilə yanaşı, Çinin "Uhan Fri Tauns" klubu və Cənubi Koreyadan bir klub maraqlanır.
Mənbəyə görə, "Akademiko" futbolçunun transferi üçün 3 milyon avro (6 milyon AZN) tələb edir.
Cari mövsümdə Andre Klovis yüksək məhsuldarlıq göstərib. O, 20 oyunda 15 qol vuraraq Portuqaliya çempionatının ən təsirli hücumçularından birinə çevrilib.
Bu göstəricilər fonunda futbolçunun transfer uğrunda rəqabətin daha da kəskinləşəcəyi və qiymətin artacağı istisna edilmir. "Qarabağ"ın bu yarışda hansı addımı atacağı isə yaxın günlərdə aydınlaşacaq.
