Anatoli Ponomaryov: “Futbolumuzda dəyişiklik üçün gənclərdən başlamalıyıq”

"Oyunu canlı izləyəcəyik. Atam da burdadır. Ailə üzvlərimiz ilə birlikdə matça gedəcəyik".

Bunu İdman.bizə Azərbaycan millisinin sabiq futbolçusu Anatoli Ponomaryov deyib.

İsveçdə yaşayan və bu ölkədə futbol agenti kimi çalışan Ponomaryov bu gün yığmamızın Millətlər Liqasında İsveçə qarşı oynayacağı matç haqqında danışıb. O bildirib ki, rəqibin rotasiyalara gedəcəyinə ümid edir: "Düşünürəm ki, stadionda çox adam olmayacaq. Çünki burda hava çox soyuqdur. 1-ci yeri rəsmiləşdirdikləri üçün oyuna çox da ciddi yanaşmayacaqlar. Deyan Kluşevski, Viktor Qyökeres və Aleksandr İsak triosundan istifadə etsələr, millimizin işi çətin olacaq. Yığmamızın bu gün qalib gəlməsini ürəkdən istəyirəm".

Ponomaryov yığmanın hazırkı durumunu da dəyərləndirib: "Yeni məşqçiyə alışmaq çətindir. Millinin nəticələrindən məmnun deyiləm. Baş məşqçi Fernandu Santuşun seçiminin nə dərəcədə düzgün olduğunu gələcəkdə görəcəyik. Azərbaycanda futbolun inkişafı üçün gənc oyunçulara diqqət ayrılmalıdır. Gələcək onlardan asılıdır. Buna misal kimi, Mərakeşi göstərə bilərik. Onlar futbol ölkəsi olmasalar da, hazırda çox yaxşı oyunçular yetişdirirlər. Azərbaycan futbolunda nəyisə dəyişmək istəyiriksə, gənclərdən başlamalıyıq".

Qeyd edək ki, bu gün "Strouberri Arena"da keçiriləcək İsveç - Azərbaycan oyunu Bakı vaxtı ilə saat 23:45-də başlayacaq.

Emin Ağa
İdman.biz