"Sabah"ın üzvü Anatoli Nuriyev Sport24.az-a müsahibə verib. "Bayquşlar"ın yarımmüdafiəçisi "Səbail" ilə oyunla bağlı fikirlərini bölüşməklə yanaşı, bizi maraqlandıran başqa sualları da cavablandırıb.
- Bol qollu qarşılaşma izlədik. Oyunla bağlı fikirlərin maraqlıdı...
- Gərgin oyun alındı, meydan sahibləri ilk dəqiqələrdən çox istəkli idilər. Onlar erkən qol vurmağı bacardı. Amma əsas odur ki, ruhdan düşmədik, irəli atıldıq və həm qısa vaxtda hesabı bərabərləşdirdik, həm də sonda qalib gəldik. Məncə, hesab daha böyük olmalıydı. Amma bir qolumuz qeydə alınmadı və penaltimiz verilmədi. İstənilən halda sərgilədiyimiz oyundan və nəticədən məmnumuq.
- Komanda qol vurmağı bacarsa da, qapısında da çox qol görür...
- Bu barədə mənim danışmağım düz deyil. Hansı futbolçuların zəif çıxış etməsi, mövqelər üzrə çatışmazlıqlarla bağlı yeganə danışmaq səlahiyyəti şəxs baş məşqçidir. O, səhvlərimizi, nöqsanlarımızı məşq prosessində bizə çatdırır. Ümumi götürəndə komanda olaraq pis müdafiə olunmadığımız qənaətindəyəm. Təbii ki, iki qol buraxmışıqsa deməli, hardasa boşluqlar verilib. Qəribədir ki, son oyunlarda rəqiblər daha çox standart vəziyyətlərdən fərqlənirlər. Bunun üzərində işləyəcəyik.
- Öz performansın haqqında nə deyərdin?
- Özümü qiymətləndirmək istəməzdim. Mənim işim daim üzərimdə işləmək və sabit olaraq yaxşı formada qalmaqdı.
- Artıq 7 tur arxada qalıb. Çempionatla bağlı fikirlərin də maraqlıdı...
- Premyer Liqada canlanma var. Hər bir komanda sona qədər mübarizə aparıb xal qazanmağa çalışır. Düşünürəm ki, bu il çempionat daha dinamik və maraqlı keçəcək.
- "Sabah" çempionluq uğrunda mübarizə aparmağa hazırdı?
- Hər oyuna qələbə üçün çıxırıq. Məqsədimiz maksimum irəli getməkdir. Əziyyət çəkirik, tər tökürük. Tanrı da bizdən kömək olar.
- Yığmamızın Millətlər Liqasında çıxışı haqqında nə deyərdin?
- İki oyun keçirdik. İsveçlə matçtda komanda daha kreativ, istəkli idi. Çoxsaylı qol imkanları yaratsaq da, fürsətləri boşa verdik. Rəqib isə əlinə düşən imkanlardan maksimum yararlandı. Yekun nəticə sərgiılədiyimiz oyuna görə olmadı. Məğlubiyyətə layiq deyildik. Slovakiya millisi ilə matçda isə baş məşqçi rotasiya etmişdi. Onlar daha güclü komandadı və qələbəyə layiq idilər. Təbii ki, istəməzdik ki, Millətlər Liqasına ardıcıl məğlubiyyətlərlə start verək. Amma olan oldu. Artıq irəli baxmalıyıq.
- Səncə, hazırkı milli nəyəsə nail ola bilər?
- Komandanın oyununda inkişaf sezilir. Sadəcə, bir az da artırmaq lazımdır. Hazırkı heyətimiz yaxşıdır. Bizə bir qədər zaman lazımdır.
ABDULLA İSMAYILOĞLU