Idman.biz
"Sabah"ın və Azərbaycan millisinin yarımmüdafiəçisi Anatoli Nuriyevin Futbolinfo.az-a müsahibəsi
– "İmişli"yə 0:1 hesabı ilə məğlub oldunuz. Bu oyun barədə fikirləriniz necədir?
– Çətin rəqib idi, ağır oyun oldu. Biz topa nəzarət edirdik, amma qol vurmaq alınmadı. Əksinə, bizə qol vurdular və bundan sonra artıq heç nə edə bilmədik. Açığı, qol epizodları yaratmaq baxımından da az imkanımız oldu.
– 2 oyuna 3 xal necə nəticədir?
– 3 turdan sonra (bir matç təxirə salınıb – red.) 3 xal nəticə baxımından o qədər də yaxşı deyil, amma hələ çempionatın əvvəlidir. Növbəti oyunlara yaxşı hazırlaşıb xal ehtiyatımızı artırmağa çalışacağıq.
– Milli fasilədən maksimum yararlanmaq mümkün olacaq?
– Mən yığmaya gedəcəyəm. Bu da müəyyən çətinliklər yaradır, çünki komanda ilə birlikdə hazırlıq keçmək olmur.
– Yığmanın Ukrayna və İslandiya ilə toplanışına dəvət olunmusunuz. Bu rəqiblər barədə fikirləriniz də maraqlıdır.
– Təbii ki, baş məşqçi mənə inanıb, dəvət göndərib. Mən də əlimdən gələni etməyə çalışacağam ki, komandam üçün faydalı olum. Yığmaya kömək etmək istəyirəm.
– Ukrayna əsilli oyunçusunuz. Bu ölkənin yığması barədə nə qədər məlumatlısınız?
– Düzü, bəzi oyunçuları tanıyıram. Amma bu, futboldur. Toplanış müddətində baş məşqçimiz ilə rəqibləri daha yaxından analiz edəcəyik. Hələlik bu qədər deyə bilərəm.
– "Sabah"ın avrokuboklarda mübarizəni erkən dayandırması sizə psixoloji olaraq necə təsir edib?
– Bu, bizim üçün psixoloji baxımdan ağır oldu. Çünki biz avrokuboklarda çıxışımızı davam etdirmək istəyirdik, amma alınmadı. Önümüzə baxacağıq.
– Fasilədən sonra ilk sınağınız "Neftçi"yə qarşıdır. Bu rəqiblə görüşləriniz hər zaman dinamik keçir. Hansı motivasiya ilə hazırlaşacaqsınız?
– Bəli, millinin toplanışından sonra bu oyuna hazırlaşacağıq. İndi 3 günlük istirahətimiz var, bundan sonra isə məşqlərə başlayacağıq. Hansı hazırlıq planının olacağını artıq baş məşqçi müəyyənləşdirəcək.
– Yeni komandaların çempionata qoşulması ümumi səviyyəyə necə təsir edib?
– Məncə, ümumi səviyyə yüksəlib. İndi yaxşı komandalar çoxalıb və düşünürəm ki, bu mövsüm çempionat daha maraqlı olacaq.
İdman.biz
